現年40歲的周慧敏(Vivian)與男友倪震拍拖多年感情穩定,二人早有共識不生小孩,寧願認愛貓周慧豹為兒子。Vivian前晚穿上一襲束腰短裙出席活動,以澄清懷孕傳聞,難道不怕倪家絕後?她說:「咁都冇辦法,我幫唔到佢。」
周慧敏(Vivian)近日被傳腹部微隆,與男友倪震現身北京,立即傳出她懷孕的傳聞,她前晚在中環四季酒店出席BCBGMAXAZRIA活動,穿上束腰tubedress,刻意展示一條小蠻腰,企圖闢謠。前晚同場還有汪圓圓和曾主演《赤壁》的內地演員宋佳。
「生仔冇晒私人空間」
Vivian穿上束腰低胸裝,大賣性感,她否認懷孕傳聞,並說:「我平時鍾意着鬆身衫,舒服啲,大家唔好咁敏感,嗰次俾雜誌影完,中港台啲朋友都SMS我,既恭喜又游說我生BB。」
對於這次食詐糊,Vivian說:「阿Joe(倪震)媽咪話倪匡仲特登用放大鏡睇本雜誌,我𠵱家24吋腰。講開生BB,我同倪震坐低好深思熟慮傾咗幾次,決定唔會生,因為BB一出世,就會冇晒私人空間,唔同養貓,貓可以唔出街,冇健康環境同空間畀BB成長,對佢唔公平。」
記者建議Vivian生BB後可移民,她說:「如果係嘅,之前喺加拿大都諗啦,返咗香港安定咗,覺得維持現狀最好。」那可是百分百肯定不生?Vivian卻說:「如無意外就唔生,但有意外會尊重生命。」Vivian強調有做足安全措施,不過記者稱倪震可進行結紮手術時,她卻顯得尷尬地說:「咁你哋下次自己問佢。」Vivian又表示對男友充滿信心,不擔心他會去滾。
「或者我哋考慮收養」
倪震的胞姊都沒生孩子,Vivian又不為倪震生小孩,那倪家豈非絕後?她說:「咁都冇辦法,都幫佢唔到,我都知倪匡鍾意BB,但佢都後生過,都鍾意自由,佢會明白我哋嘅感受同決定。倪匡都有孫周慧豹(周慧敏愛貓),或者我哋考慮收養。」
採訪:梁錦雯
攝影:仇志德