轆Book：SUV演繹跑手本色

第一眼睇佢，高頭大馬，成副SUVLook；望真啲，低風阻嘅高傾斜度擋風玻璃、全車極為立體嘅浮凸線條，風格又跟一般嘅SUV有明顯分別。究竟點定位？MAZDACX-7就話你知可以有新概念——玩Crossover！SUV嘅高視野、闊落內櫳，有！不過設計基礎，係跑車！加上高效能缸內直噴引擎同6前速+/-波箱，跑得本色，出晒！

記者：黎頌詩
攝影：王文忠
Model:Winnie

多重混血Crossover

自從MAZDA花心思創新，確立了「Zoom-Zoom」這品牌概念，明顯走對路線，新作不時都叫人眼前一亮。今次嘅CX-7，依然係驚喜之作。SUV近年人氣十足，好揸有型當然係一大原因，香港有幾多機會俾你攀山涉水？不過，SUV特質喺CX-7身上可以話係「虛有其表」！CX-7只選取咗SUV「高」同「大」兩個強項，帶嚟嘅舒適乘座感，喺細節位上，則明顯跑車格局，講到性能，就如一般房車，強調實用環保。猶如多重混血嘅呢招Crossover，佩服！本身都鍾情高身SUV，所以一見高人一等嘅CX-7已經先行加分，然後再發現佢嘅濃烈跑味，更加喜出望外。車頭係RX-8嘅變種，一條極有份量感嘅線條由A柱延伸至鬼面罩，令頭冚極為突出，加上弧度十足嘅闊大輪拱，極有跑車影子。喺霸道嘅巨型氣壩兩旁，呈「C」字形嘅霧燈設計又顯得相當別致，原來尾燈都係造型相若，「C」原來代表Crossover，好有特色。打開車門，予人豪華感，最明顯係「好皮氣」！座椅由不同紋理皮料配襯，加上門身同中控台上方物料都甚有真皮質感，感覺幾高級。

■18吋份量感十足的胎軨，提升車身高度，扮SUV功不可沒。

■座椅以不同紋理的皮料配襯，感覺高級。

■內櫳走豪華路線，但香港版中控台上沒有屏幕。

■傾斜度達65.6°的擋風玻璃，直逼跑車設計。

■MAZDA第一次引入香港的6前速+/-波箱。

■匙卡超薄輕巧，精緻又有豪華感。

全身窩心陳設

隨住車門打開，吸引視線嘅除咗嗰陣貴氣，仲有錶板上漸漸滲出嘅藍光，點火後紅光隨之亮起，似蓄勢待發，甚有互動Feel。其實，人性化亦係MAZDA近年嘅一大賣點。強調實用、生活感嘅設計心思亦處處可見。今次就以隱藏式門檻做冧招，門檻被車門遮蓋，保持清潔之餘又更窄身，上落更方便。前排座椅亦闊過人，門邊更設有皮手枕，有心思夠窩心。講實用，仲不得不提尾廂，唔單止地台可翻轉變防水面層，而且只需拉一下兩旁手掣，後排椅背就即時放平變出大尾廂！研究完一輪，係時候開車啦！MAZDA首次引入缸內直噴Turbo引擎，同6前速加減波箱又點可以唔試？238匹馬力本來已經好有力量感，加上扭力喺2,000轉開始已經輸出達99%，加速反應明顯凌厲，發力踩油上斜，竟然有啲推背感！原來，大大嚿嘅佢，由0到100公里加速，都只係8秒，真係估佢唔到！