中國人骨子裏嗜賭，不過好似只限麻雀、天九、骰子呢類國產出品！21點？硬係好似老外嘢，唔多投入；難怪《鬥智21點》喺北美票房大收冠軍，嚟到香港7月上畫無Noise之餘，仲要急急腳8月出碟趕尾會；故事改編自九十年代麻省理工（MIT）大學生馬愷文（Jeff）以計牌絕技，贏盡美國賭場數百萬美元真人真事，想學一招半式？咁今個星期呢隻DVD就必買，事關Making就教盡你數牌秘技，睇完過大海智鬥何鴻燊，以後仲使食佢叉燒飯！
記者：朱崇德
MIT師生組隊群賭
記者細路哥年代就聽過有MIT學生，用計數方法贏到美國賭場雞毛鴨血，當時以為係吹水嘢，後來先知真有其事！《鬥智21點》改編自美國暢銷小說《BringingDownTheHouse》；故事講述賓．甘寶（即現實中馬愷文）本為MIT數理系學生，因籌措30萬哈佛醫學院學費而煩惱；後遇統計學教授米奇．羅沙（奇雲史柏斯飾）邀請，以數學機率方法，想出21點的必勝秘訣；後來拉斯維加斯賭場保安高爾．威廉斯（羅倫斯費莎保飾）識破他們數牌伎倆，佈下天羅地網誓要將他們追捕。
拉斯維加斯 實景拍攝
若論聲畫，十幾條聲軌加字幕，平均Biterate只去到4.5MB/S，相對上9MB/S嘅一級美版片，真係完全無得比，不過賭枱故事，文戲多動作少，無爆格、只係少少粗微粒，都叫嬲唔落；不過電影以真拉斯維加斯賭場作場景，真實感十足又加番分，須知Jeff曾經喺呢啲賭枱贏過幾百萬，直至現在佢都唔可以行近21點賭枱20呎範圍，拉記賭場俾電影作實景拍攝真係幾神奇；據知賭場個如意算盤係想啲人睇完套戲，學又學唔晒咁入去俾佢劏，所以話唔賭、唔輸係無錯嘅。
Making Jeff計牌方程式
講到全隻DVD戲肉，當然係Making啦！頭Part講21點歷史源自法國、賭場基本禮儀，對歷史無興趣可以飛過；第二段就係教21點秘技；首先係「要牌表」，先計自己點數，再睇莊家係乜嘢面牌，幾時應該博牌，幾時應該過牌等莊家爆煲，完全用數計出嚟，跟住賭都好大機率贏。
跟住就到Jeff賭神秘笈，以機會率計算下張牌係乜，不過更大難題係莊家每次洗4-6副牌，要完全記得出過乜嘢牌先計到，唔怪得拉記賭場唔怕你嚟「交學費」啦！
