入正題。自從政府第一次想將房委會轄下嘅商場套現，攞錢救房委會去繼續興建公屋。我哋呢啲自由市場人士，都不斷安慰自己，雖然政府攞到幾百億去膨脹官僚，不過因為商場被民營化，脫離官僚魔爪，每日使用商場嘅公屋居民，生活都會好過啲。
最後幾經波折，啲商場成功民營化，變成今日嘅領匯（823）。而因為領匯最終要成功，就係要同消費者、公屋居民站喺同一陣線。反對上市嘅人最終被鬧到趴街，民意大戰中，領匯先記一功。
商場租霸剝削消費者
點知，嗰批反對人士，因為係一班勾結商人嘅議員，為咗包庇一直掌控房委會屋邨商場嘅租霸，不斷抹黑領匯，製造假象，令好多記者覺得，呢啲以低價租到舖位之後，以市價再轉租畀其他人嘅商場租霸，居然係企喺消費者、公屋居民嗰邊。
民意大戰中，實行嚟個《租霸反擊戰》。
冇辦法，所有要求政府立法控制市場運作嘅人，最終只係參與剝削消費者嘅官商勾結、分餅仔遊戲。問題只係不同類別嘅政黨，要求將餅仔分畀唔同商人。
例如立法會新界東選舉中，有一個成日要求政府資助企業嘅豉油黨候選人，就被送餅諷刺佢鍾意分餅仔畀大企業。不過，呢個豉油黨候選人唔肯收，原因係盜亦有道，因為送餅嘅選舉對手，就係支持商場租霸既得利益集團嘅其中一位議員。來自瀉聞連。
領匯出招反擊
點知，當我仲估領匯管理層，完全唔介意俾人抽水、淪為拉票項目時，領匯忽然反擊！領匯前日宣佈，下個月開始喺轄下街市設公正大磅，向舉報「呃秤」嘅市民派200蚊購物券。仲要如果商販因「呃秤」被定罪，會中止呢啲商販嘅租約。
領匯今次清清楚楚同公屋居民站喺同一陣線，大家就睇吓瀉聞連點繼續包庇屋邨商場租霸。
比起平時，今次真係好清晰咁，將商場租霸同公屋居民嘅利益界線劃清，希望領匯會繼續凸顯同公屋居民同一陣線嘅功用。睇吓瀉聞連仲會唔會抽領匯水。真係好似拍戲，民意大戰第三集—《領匯復仇》。好睇！
網誌： http://phatdat.blogspot.com