摩連奴不愧係新聞天王，執教國際米蘭後日日有新嘢，好似前國米助教米赫洛域早兩日就攻擊摩帥用錯訓練方法，搞到班球員傷晒；事隔唔夠一日，史坦高域急急為新帥護航，話摩帥咁樣練係冇問題。到底當中邊個係實說實話？邊個係對人唔對事？有冇擦鞋仔？
首先聽米赫洛域點講。「我踢波咁多年，通常教練喺開操初期都先唔用波，主要操體能，但摩連奴一上任開操就用波，球員未夠狀態就帶波訓練，容易傷，咪搞到一大籮傷兵、防線告急囉。」
米赫洛域鬧訓練方法錯
米赫洛域講得振振有詞，因為國米實在有大棚傷兵，後防就有馬特拉斯、森美爾、哥度巴同埋貝廸素。有輿論認同米赫洛域，話摩連奴始終都係「書院派」，某啲方面係差少少。我求大俠唔係教練，唔敢講摩帥嘅訓練方法有冇問題，只係覺得「書院派」做事好細心，而森美爾、哥度巴喺摩帥未嚟之前已經傷緊，入埋佢數好似唔多公平啫。
史坦高域擦鞋話係享受
米赫洛域追隨文仙尼多年，文仙尼落台佢當然冇得撈，唔通睇見摩帥一到就捧意超盃而眼紅？
史坦高域就力撐新帥：「老實講，我踢波13年都係第一次見教練會咁做，但唔代表有問題，我不知幾享受。」咁就奇嘞，米赫洛域同史坦高域由拉素到國米，前後共事差不多10年，冇理由同一系人有唔同體會啫？點都好，呢件事發生咗兩三日，摩連奴一句都冇回應，唔多似佢性格。或者，米赫洛域根本唔存在佢視線範圍，要窒人，寧願留番啖氣窒AC教練安察洛堤、祖記教練雲尼亞里好過啦。