暑假剩番幾日，學生聽到返學就唔開心，男拔萃學生今年更加傷感，因為開學日回歸校園，桃花依舊人面全非，喺校內經營咗26年嘅小食部冇得做落去，校方招標後引入連鎖快餐店大家樂，引起學生好大反應，連舊生都群起聲討，有人喺facebook開咗個group「竟然連TuckShop都冇埋」，矛頭直指校長張灼祥同校董張宇人。
小食部敵不過大家樂
據知暑假前5、6月左右，校方已通知小食部唔續約，當時大家樂會進駐男拔消息不脛而走，校內有傳言，指校長張灼祥覺得小食部冇乜問題，校董兼飲食界議員張宇人卻認為大集團先信得過，之後校方就話要公開招標，可能有人想畀個機會小食部啦，不過開標結果冇驚喜，tuck記要執包袱，由大家樂接手。
男拔小食部已經做咗兩代人，幾代學生都幫襯過，可以話係集體回憶，日後變成大家樂，大家去附近快餐店、麥記hea咪一樣！有舊生同八方講，至今仍好懷念老闆娘二嫂，𠵱家打骰嘅Bill哥亦同學生好friend，因為佢哋好易話為，幾乎有求必應，更令人回味嘅係烘兜亂、雜會河、大雞米、咖喱魷魚；另一舊生仲誇張，話tuckshop碟星洲炒米真係一流，畢業多年，喺外面都食唔番嗰種滋味，𠵱家為口奔馳，幾乎日日食大家樂，估唔到師弟未畢業就要硬啃。
一間中學小食店，小本經營多年相安無事，點解會犧牲喺大集團之下呢？知情人士指出，由於男拔興建新宿舍，未來越來越多學生寄宿，一盤小生意變成供應數以千計學生伙食大茶飯，tuckshop又邊有咁大胃口啃得落一大嚿肥豬肉呢？呢位人士話，男拔轉直資諸多改革，變得越來越商業化，卻未必係學生之福。
張校長噚日話，日後宿舍落成膳食需求大增，tuckshop規模有限做唔嚟，校方招標後決定搵大家樂接手；張宇人則話只係將飯堂管理外判大家樂，唔係校內開間大家樂，佢又話家長希望學生飲食健康，日後提供咩食物，例如賣唔賣薯條、汽水等垃圾食物會再諮詢。
mailto:[email protected]