〈英超早飛王〉返嚟喇！幾個月冇寫此專欄，感覺就等如擺咗個仔喺親戚度一排，𠵱家終於「湊」番佢屋企一樣！上季早飛王首度出街，即做出6連勝佳績，希望新一季繼續幫到大家贏錢。第1期畢傑誠意推介：周六布力般流浪作客韋斯咸不敗，揀下盤。
我諗大家一定玩過「包剪揼」遊戲，而國內就叫「布、剪刀、石頭」；識玩嘅朋友都知，遊戲嘅不變定理永遠係「布」贏「槌仔」。就今場而論，我對出「布」嘅布力般，可贏出「揼」嘅「鎚仔幫」韋斯咸。
恩斯有料到
近季英超現象，多咗好多前曼聯名將做領隊，好似新特蘭嘅堅尼、曼城嘅曉士、降咗落英冠嘅伯明翰嘅布魯士等，今季則再加多個布力般嘅恩斯。開季前，畢傑都好懷疑恩斯有幾多料，理應有排執先見到成績，因為呢位40歲少帥只係教過乙組仔馬格斯菲特、同埋英甲嘅米爾頓凱恩斯，都唔知算唔算領軍經驗。
之但係開季至今，恩斯帶領嘅布力般都算交到功課，最重要係佢唔打沉悶足球，贏緊輸緊，戰術上都好進取，淨係呢點已經值得尊重。好似聯賽首戰作客愛華頓，實行同對手鬥攻；賣走咗賓尼唔緊要，仲有辛達告魯斯同摩頓柏達臣等好手壓陣，結果就喺葛廸遜公園贏3:2，絕非符碌。布力般今周只得中場鄧尼一個傷兵，人腳上可容許佢哋不敗。
韋斯咸防線超殘
主隊韋斯咸就慘喇，除咗中堅安頓費廸南過檔新特蘭外，今仗有中場重心麥克盧保停賽，加上比拿美、史碧達、占士哥連斯、加比頓、湯堅斯同佐治麥卡尼又要養傷，陣容之殘實在難讓平/半。
大家可留意吓，傷兵除咗比拿美係前鋒外，後面5人全部都係後衞；𠵱家得番尼爾、厄遜同廸雲樸有得揀，新兵比哈美上仗又俾曼城嘅馬田柏杜夫玩到渣都冇，唔打少個麥克盧保，結果應該都係輸波收場居多（該仗曼城勝3:0）。睇見韋斯咸個陣真係牙煙，仲要讓布力般平/半？今場我信「包剪揼」理論，揀下盤開頭炮。文：畢傑
早飛王貼士
星期六26韋斯咸vs布力般流浪
首選：布力般流浪（下）
次選：韋斯咸大（2）
冷選：布力般流浪勝2:1（9）
周末早飛超級重心
星期六23：拖肥糖吼「細」
愛華頓可強陣，前鋒耶高保兩戰入兩球，惟其餘只有阿廸達表現較佳；樸茨茅夫箭頭高治及廸科爾未磨合，更有卡蘭積卡養傷3個月。
星期六24：韋根反底格
侯城開季1勝1和，今周有中場保定因傷缺陣，唔信連贏3口盤；韋根守將賴恩泰萊傷癒復出，只餘左閘艾特文養傷，今役屬反底格局。
星期六25：米堡「篤」定開「大」
米堡上仗尾段反敗1:2予利物浦，惟攻力有改善，尤其美度在聯賽及英聯盃俱有入球，今周可強陣；史篤城入得又失得，1.88倍「大」抵買。
難啃早餐
星期日25：唔要紅軍上盤
利物浦歐聯外消耗120分鐘才晉級，更缺謝拉特，周日作客維拉臨場有機轉平手，早飛唔抵買。