七月七日，本欄講及奧運概念股，認為愈快沽清愈好。眨吓眼，○八奧運已經成歷史，內地股票疲不能興，粵滬綜指持續下滑，以事實證明，奧運概念對投資選擇毫無作用。試睇吓，二○○七年十二月三十一日，恒生指數係27812點，八月二十七日大幅反彈之後，收市報21464點，由年初計起，唔見咗23%，滬綜指呢，更杰，○七年十二月三十一日係5261點，八月二十七日係2342點，唔見咗55.5%，買內地股票者，想追番平手呀，有排等。
《南華早報》LaiSee心水清，搵出九隻奧運贊助股，有晒奧運概念啦，京奧開幕禮最威嗰位當然係負責點火嘅李寧，但佢隻股票2331嘅八月二十七日收市價十九個一毫八，與○七年十二月三十一日嘅二十九元一角比較，減值34%，以同樣方法推算，其他奧運贊助股嘅表現係：
國航（232）跌65%；統一企業（220）跌52.3%；青島啤（168）跌34.5%；中移動（941）跌30%；中石化（386）跌32%；聯想（992）跌21%；中國銀行（3988）跌21%，倘以今季最低位比較，奧運贊助股嘅跌勢更得人驚。
二○○八年係奧運年，亦係美國大選年，傳統智慧話奧運主辦國會谷起股市，營造歡樂氣氛，而美國政府會幫白宮主人嘅政黨打氣，谷起嗰市，以免自己政黨飽受對方攻擊。點知今年中國與美國政府都無力救市，或者係有心無力啦，盲目相信政府可以干預市場者，今年情況足以為鑑。
呢排左丁山碰到幾位本地經濟師，對下半年經濟一致表示悲觀，明年第一季更係「高危」，有負增長嘅可能；碰到一啲銀行高層，佢哋同樣不樂觀，因為同業拆息市場緊之又緊，單睇利率睇唔出嚟，銀行唔肯借錢出嚟嘅話，證券行與對沖基金邊度有大錢去炒？唯一樂觀嘅，就係波浪分析師老許，波浪許話佢自己只看走勢，不看基本因素與不聽甚麼小魔雄嘅3700億元人民幣救市消息。睇波浪圖嘅結論係……波浪許語出驚人：一定要入市買A股（如A50基金或其他代替品H股），跌夠喇，反彈將臨喇。講得咁大聲，波浪許信心十足，左丁山警告佢：「慎防俾人拆招牌！」