容祖兒同鍾舒漫前晚喺銅鑼灣出席MAX&Co.秋冬時裝展，而𡃁界女神Angelababy同AnaR.就擔任模特兒行騷，由於現場冇冷氣，啲嘉賓同模特兒都熱到標晒汗，Angelababy話：「好彩我冇體臭，頭先做電視台訪問都怕個妝會溶。」
講起近期嘅熱門話題，梗唔少得奧運選手，原來祖兒最欣賞程菲，佢話：「好欣賞佢倔強嘅眼神，雖然佢比賽時失過手，但表現堅強。」有人話祖兒似跳水選手吳敏霞，但祖兒居然唔識佢：「邊個嚟㗎？不過有人話我似外國女排選手，其實好多人話我對眼似黑人，不過都係靚，唔係醜化我，真係要問阿媽點解生我咁，可能我嘴肥牙白所以似。」
粗口留言睇到煩
祖兒噚日去新城電台做訪問，佢話大滙演同郭晶晶、吳敏霞合唱張韶涵嘅《隱形的翅膀》，佢話要先錄音，問係咪拍檔唱唔掂，佢話：「唔係，因為環境唔許可，唱唔到live。」至於點解唔唱《我的驕傲》，祖兒話：「應該係委員會揀，要經過好多審批。我唔介意唱咩歌，呢個係好開心嘅慶祝活動，首歌係好有意思嘅，而且《我》都唱過好多次。」另外，有人不斷喺祖兒blog以粗口留言，佢話：「睇到就好煩，但唔會因為咁唔寫blog。」