京奧落幕，小藍真係有啲失落，特別係開幕嗰場表演，用高清攝製播放，亮麗壯觀嘅千人擊缶，加上澎湃環迴聲效，睇到唔少師奶要即刻換高清電視機，機頂盒更一度賣斷市。
為咗延續高清熱潮，亞洲高清協會下月26日至28日會喺數碼港舉辦首屆高清視聽展，入場費10蚊，高清影音器材大晒冷之餘，仲搵埋at17同新人歌手黃鎧晴擔任高清大使㖭。有高清有靚女，小藍當然第一時間收吓風啦！
即場試玩高清遊戲
亞洲高清協會主席James話，呢個展覽可謂集中最新最多嘅高清影音產品，又有高清遊戲即場試玩，仲會播放PlayStation最新製作嘅楊千嬅嘅高清MV，大唱新歌《明日再會》，畀入場人士睇吓人靚聲甜嘅高清效果。
本身係影音顧問嘅協會執委Alan話，今次舉辦高清展，消費者可以一次過喺場內比較唔同產品好似機頂盒嘅質素同價錢。仲有影音顧問即場講解㖭。另一執委兼製作人蕭潮順話，有高清器材都有高清節目先得，之前已經做咗多個本地高清演唱會，下個月會用高清攝製粵劇。又同食家蘇施黃合作製作60集嘅高清飲食節目《蘇Good》，諗住安排喺無綫播出。James話，高清展都會播放呢啲片段，市民可以先睹為快。
逢周五刊出