京奧之所以能夠舉辦得咁成功，全賴背後有一班人嘅努力。好似「亞洲神童」張如城咁，佢花咗4年時間，嘔心瀝血寫咗首唱好京奧嘅《友誼的光彩》，仲特登喺閉幕當日凌晨上咗無綫嘅音樂節目，將呢首歌送畀大家，都算唔話得。
闊別咗樂壇7年嘅城城今次強勢回歸，雖然面形同身形都脹咗兩個碼，但佢嗰份堅毅同自信就多年不變，尤其係佢着住件奧運tee上台表演嗰陣，神童嘅光輝表露無遺。城城嗰首《友誼的光彩》，雖然冇一個主要嘅旋律，但前奏已經畀人好rock好澎湃嘅感覺，聽到人熱血沸騰。歌詞方面，城城沿用一貫中英夾雜嘅特色，好似一句近乎走音邊緣嘅「together...together...together」咁，就充份顯示咗團結嘅力量。
旋轉舞姿耍家
除咗首歌掂之外，城城最耍家嘅舞姿當然都不容忽視啦，一個360度轉體加個左手迴旋擺，完全冇難度，比起7年前嘅《真愛是真》更加精力充沛。但唔知佢係咪太耐冇上電視，唱完歌嘅時候主持姜文杰係咁易「wow」咗一吓，城城竟然被嚇窒，似乎細膽咗啲喎！
原來城城呢首歌8月初已經派咗台，嚟緊仲會拍MV㖭，佢經理人噚日就話：「其實當初北京宣佈搞奧運，張如城已經有個心願想整首歌出嚟，𠵱家國內都有人邀請佢上去唱呢隻歌。」
網民彈多過讚
城城回歸樂壇都算08喜事，不過網民嘅反應就麻麻，louisyeung1012話：「3、4年作啲咁嘅嘢，不如去建設社會吧啦。」而cablefans就話：「我以為佢唱泰文㖭。」
http://www.youtube.com/watch?v=Oz1gVYMGYLE