奧運馬術場每晚都有好多外國人觀眾，各佔陣地，其中橙衣人最多，荷蘭選手穿橙色上裝，荷蘭記者與觀眾穿橙色T恤，最容易認。安琪在盛裝舞步賽自選動作最後一圈，得分82.4，平均分78.68，比德國伊莎貝多2.03分，從後趕上，連續第三次獲頒奧運金牌，奏畢荷蘭國歌後，荷蘭人與德國人一齊揮舞國旗歡呼，激動之中見和諧，左丁山向身邊一位橙衣女記者高呼一聲Anky，佢幾乎想攬埋嚟錫左丁山一啖。
香港果然係福地，八月八日前，颱風「北冕」與香港擦身而過，跟住馬術賽開幕，除咗十一號早上有微雨之外，其餘賽日陽光普照，賽事順利舉行。唉吔，到咗八月二十一日最尾一晚，掛三號風球，大家好緊張，驚住賽事受影響，點知颱風「鸚鵡」識做，姍姍來遲，二十一日晚上沙田有微風無雨，於是場地障礙賽之個人賽進行順利。賽前驗出有四匹馬使用禁藥，被着令退出，香港林立信本可補出，但佢匹馬Urban已經疲乏兼且肚痛，不適宜出場，於是林立信錯失一個現身奧運決賽嘅機會。另一位後補，瑞典選手LottaSchultz在下午兩點半到商場購物之際，收到電話通知出場，自言喜歡到流眼淚，即刻趕回沙田做準備。
三十四人爭金牌，第一輪淘汰咗十二人，其餘有十人罰分零，十二人有四個罰分（即係跳欄時踢跌一個欄），一齊晉級第二輪，緊張咯，啲世界級名將如德國LudgerBeerbaum，比利時JosLansink，英國TimStockdale等都無緣爭金，瑞典Bengtsson與加拿大Lamaze齊得零罰分，要加賽一圈（jump-off），加時比賽除咗計罰分之外，亦要計時間鬥快，七個選手加賽爭銅牌，似足跳欄跑馬咁緊湊，卒之由美國得銅牌。瑞典選手本來一直順利，點知到咗最後一欄，隻馬可能已經攰咗，過欄時後腳踢跌一欄，瑞典觀眾驚呼聲四起。到加拿大選手出場，相信壓力大到不得了，但佢知道即使跑慢一啲，如果過晒障礙就可以奪金，果然小心翼翼之下，再次得零罰分，全場萬二觀眾齊聲歡呼喝彩，加拿大人興奮莫名，Lamaze得金牌後，按例騎馬環繞賽場，向觀眾致謝。佢就走足三個圈先至依依不捨，揮手拜拜。