奧運結束，閉幕禮不如想像中咁好，仍然係「黃金甲」嗰套，藝術B盛讚平面、立體圖案設計之美，令人嘆服，但佢不禁懷疑，張藝謀之《英雄》、《黃金甲》兩齣電影，是否就是張大導之奧運預演？藝術B話：「我諗張大導拍戲時，已諗緊奧運開幕禮、閉幕禮，故此利用拍片嚟試吓啲技術及效果先，成功咗，再將電影場面放大幾十倍，就造成開幕禮與閉幕禮嘅現場場景。」咁大場面，非用人海戰術不可，中國正好有大把人，四年後嘅倫敦，冇法子仿效，以後其他國家辦奧運，亦無可能製造同樣大場面。
數數金牌，中國大勝美國，51面對36面，至於加埋銀牌銅牌，中國有100面，美國有110面，相差不遠，以金牌三分，銀牌二分，銅牌一分計，中國有51金21銀28銅，共223分，美國有36金38銀36銅得220分，僅敗。美國一些人士話美國輸得少，由得佢啦，反正美國知名體育記者PeterBerlin都話世人只會記得金牌得主，邊會記住美國贏得銅牌？
但中國是否係體育超級強國呢？睇真啲，唔係噃，中國金牌集中幾個傳統強項，如體操11面，跳水7面，舉重8面，射擊5面，呢四大金牌倉庫已佔去31面或總數嘅六成，再加埋乒乓4面，羽毛球3面，就佔去金牌總數四分之三，在最多金牌嘅游泳、田徑項目，中國只得一面金牌，鳥巢內競技，竟然冇奏過中華人民共和國國歌，其實觀眾有啲冇癮，至於集體球類運動（足、籃、排、水、曲棍），中國金牌掛零。
仔細諗吓，女子舉重、跳水、體操、射擊等運動都需要極度專注嘅強大訓練，帶有健康危險性，問吓郭晶晶點解唔係眼睛亮晶晶，而係矇矇哋，就知道大概。中國勝在人多，農家子弟不惜犧牲，連年苦練，呢一點係外國人做唔到嘅。到咗外國流行嘅大眾性運動，如游泳、田徑、足球、籃球、排球、曲棍球，中國就完全處於劣勢，到咗2012年倫敦奧運，中國仍然要倚賴六大項目搶金牌，可能有潛質嘅會係拳擊與賽艇。