通脹高企，柴米油鹽交通費樣樣加，唔少打工仔臨到月尾，銀行紅簿仔已見紅，惟有勒緊褲頭等出糧。
月省三成開支
據《錢江晚報》報道，呢班網友為咗慳錢，會將日常生活各項開支詳列，連幾毫一蚊都唔放過，詳細記錄。佢哋仲會喺網上分享佢哋嘅「賬簿」同慳錢絕招，有網友因而每月支出節省三成以上。
呢班網友唔少都係25到35歲嘅白領，有啱啱畢業出嚟打工，或者結婚冇耐，買咗層樓或者細路仔啱啱出世，兩公婆每月收入掹掹緊，生活壓力好重，為咗避免每月出現財赤，惟有每月記低一分一毫嘅支出，慳得就慳。網民小魚兒話：「每天記賬後才能體會到賺的錢不是你的錢，省下來的才真正是你的錢。」有賬客分享慳錢心得，「千萬不要動用百元大鈔，不然東西沒有增多，拿出的一張錢卻沒有了。」