曾經同玄彬喺韓劇《雪之女王》中爭女嘅韓國男星林朱煥，噚日凌晨5點半乘坐經理人駕駛嘅汽車前往新片《霜花店》片場途中同貨車相撞，二人齊齊受重傷，頸椎受傷嘅林朱煥估計要醫治3個月，而肇事車輛就要報銷。執番條命仔嘅林朱煥其後已轉往首爾嘅醫院接受進一步治療，佢所屬事務所指佢會停工休養，等待傷勢好轉。