如果腳頭重嘅懷斯係「少林大力金剛腿」嘅話，我估賓希姆一定係「鐵頭功」。呢位曼城以色列中堅，周日喺聯賽大勝韋斯咸3:0場波，連隊友都唔放過；喺一次高空爭奪戰中，一嘢頂落米卡李察士個頭度，結果後者即時K.O.暈咗，仲要吸住氧氣筒被抬離場，我求大俠話賓希姆一定係「大師兄」！
賓希姆效力車仔期間，真係坐冷板多過乜，好多網友都話佢屈埋屈埋勁多怨氣。其實賓希姆早有前科，上年喺車仔一次操練中，佢就一腳「噬」落隊友施治塊面度，搞到呢位門將要縫50針。計我求大俠話，賓希姆肯定坐冷板坐得多，成日唔使落場比賽留番好多體力，賽後就靜靜雞走去苦練「鐵頭功」。
他信現身即大勝
家陣賓希姆過檔曼城終於爭到正選，但呢鋪鍾意「辣」低隊友嘅癮仲未戒到。今次爭頂中K.O.咗米卡李察士，後者仲昏迷咗近10分鐘，你哋都咪話賓希姆嘅「鐵頭功」冇料到！好彩米卡李察士最後都冇事出咗院，唔係賓希姆有排內疚。
講番日前場波，唔知係咪曼城老細他信都入場昅實，搞到班球員個個搏晒老命；結果曼城藉住韋斯咸打少一件下大勝對手3:0。班主他信果然冇入錯球場睇波，相信佢都應該收貨，賽後仲話會留隊多10年，去履行同曼城之間嘅協議。