摩根大通首席中國經濟學家龔方雄上個禮拜二發表報告，話中央正考慮一個2000億至4000億銀嘅刺激經濟方案。消息一出，上海股市第二日即時反彈超過7%，帶挈恒指升2%。不過，美林隨即發表報告轟炸「救市傳聞實無根據」、「大陸外滙儲備不可能用於救市」，兩大外資行罕有互片。
高僧上身罪過罪過
咁都唔止，超人李嘉誠亦加入戰圈，上個禮拜四長和業績會，俾記者問到大陸救市方案，佢好唔客氣咁話：「如果有人利用呢啲消息賺錢，就真係罪過！罪過！」又話：「股市要由經濟反映出嚟先至正常，靠政府救市係不切實際。」
龔方雄或者摩通係咪罪過，華華係常人唔係超人，唔敢亂講，但大陸新浪財經網就特登闢出專版，深入分析呢單救市傳聞。
呢場口水戰，越演越劇烈，加入戰圈嘅仲有國務院參事任玉嶺，佢向人民網話，「中國政府考慮這項措施（指千億救市）不無可能（即係有可能）。」
市場由質疑變相信
《南方日報》亦話內地官方經濟智囊正齊集北戴河，商議最新經濟政策，《中國經濟觀察報》仲話從多方求證，上頭的確考慮緊擴張性財政政策方案，目的係適當緩一緩緊縮政策，防止經濟下滑。
報道仲有方案嘅金額，話係大約3700億銀，其中包括2200億銀新增支出同1500億減稅計劃㖭。
市場由質疑到開始認為呢個救市方案非空穴來風，究竟龔方雄預言會唔會成真，抑或超人繼續高僧上身，鬧人罪過？就要下回分解嘞！