外滙基金正研究係咪涉足投資私募基金，梗要搵番市場人士嚟搞搞新意思。華華聽聞，冇耐前加盟金管局儲備管理部，任職新設直接投資處主管一職嘅許龍鶴，係資深投資銀行家，佢先後喺摩根大通同滙控（005）做過，離開獅子行前，擔任滙豐投資銀行亞太區金融機構主管兼韓國主管，多年嚟專責收購合併同投資顧問。
韓國主管為外援
有中環人話畀華華知，若果外滙基金想喺私募基金搵食，咁請個有M&A背景嘅市場人士，係非常合適嘅安排。
同呢位韓籍人士一齊擔任金管局直接投資處主管嘅伍展恆，亦係來自市場，未入局前擔任投資界基金經理。
以往金管局儲備管理部，一直只設有一組直接投資，𠵱家開多組兼請埋有i-bank背景嘅賓架，睇嚟外滙基金都係時候創新投資，食吓大茶飯。