奧運完結，還未稍作休息，球迷就開動引擎，英超率先開鑼，各大足球聯賽晚上凌晨追得金睛火眼。睇波不離花生薯片啤酒汽水，捱夜本已傷身，加上大量高脂多鹽的零食，日積月累禍從口入，罪過罪過。提神小吃唔係唔畀你食，但今時今日要揀得健康啲。
記者︰陸俊雄
攝影︰譚盈傑、王文忠
Model︰Cherry@PureModels
正視虛火麥汁代啤酒
捱夜傷神傷肝，中醫師林子揚提到，日為陽，夜為陰，晚上是身體補充津液，「肝藏血藏陰液，打亂陰陽，會刺激肝臟令虛火上升。」長期傷肝，影響是頭痛、眼亁、喉嚨痛、燥咳、小便黃和大便亁等。醫師︰「既然減少唔到波癮，惟有吃些減少虛火進一步上升的小食。」
啤酒用麥釀製，雖稱鬼佬凉茶，有幾清熱唔知，但飲肥人就係人都知，那不是逢麥皆避？唔使，反之原來飲有機黑麥汁，有提高睡眠質素功效，外形激似啤酒，仲寫明德國入口，飲落原來有汽，味似淡口的川貝枇杷露但不漿口。醫師說虛火過盛，會有失眠和亢奮情況出現，多飲黑麥汁，正好打個和，含維他命B維持皮膚健康。除麥汁外也可揀有機桑椹汁，不酸而且清甜，清爽到位。
果仁要食低溫烘焗
任何果仁，一遇油炸，講到幾健康都係假！如睡眠不足，令記憶力不好，吃點低溫烘焗的南瓜仁補補不錯，因內含不飽和脂肪酸，而且是Wasabi味，放到舌上縱使未咬，芥末味已滲出，咬落爽脆，好味提神過花生，強力推介！至於薯片，好難叫人唔好食，要食不如揀低鹽、低脂、不含反式脂肪的。如美國Kettle註明無鹽和不含反式脂肪，少了鹹味，但薯味很突出。另一隻是美國Terra的RedBliss，以橄欖油製造，更標榜少30%脂肪，比一般薯片厚身。
不忘傳統凉果
上環陳意齋所出的無糖杏霜，有潤喉潤肺功能，捱夜啱晒。特別推介還有薏米餅，口感似杏仁餅般，一定令你多了飲水；加上薏米有去暑功效，這天時食確實係時候。
售賣點︰
a）綠盈坊（28026565）
天后電氣道74-78號地下1A舖
b）陳意齋（25438922）
皇后大道中176D號地下
c）SogoFreshmart（28338338）
香港銅鑼灣軒尼詩道555號SogoB2