日前Gucci喺香港舉行時裝展，事後有報道話當晚關之琳喺會上主動結識台灣男星郭品超，仲讚佢靚仔。不過有消息指係男方經理人公司放料，而之之對呢件事嬲到震，噚日特別透過朋友澄清，強調嗰晚係郭品超搵佢影相之餘，佢仲質疑台灣偶像係咪興炒作。至於郭品超就一時話唔記得，一時又承認係自己搵之之影相，總之成隻馬腳都露晒出嚟啦！