溏心風暴之家好月圓鬥戲人辨 第二回
黎耀祥在《溏心風暴之家好月圓》中飾演的年子勇深受歡迎，尤其他踢爆「Sa姨」關菊英出賣家人一幕最大快人心。原來無綫本想祥仔跟菊姐做鬥氣寃家，但因檔期問題而告吹。祥仔坦言愛跟菊姐嗌交，說她鬧人如唱歌般好聽。 撰文：戴彩煥
黎耀祥飾演的年子勇（花名蓮子蓉），在第12集《溏心風暴之家好月圓》中，終於一償心願到澳洲發展，跟觀眾暫別，至大結局始再次出現，應「阿卡」陳豪邀請，由澳洲返港擔任家好月圓餅店總監，以及順道出席「Jo飽」夏雨的生日宴。
機場被女圍
其實監製劉家豪希望黎耀祥由頭玩到尾，可惜因為黎耀祥同時要兼顧《同事三分親》和《盛世人傑》而告吹。黎耀祥說：「原先有個構思係我同菊姐（關菊英）做鬥氣寃家，然後同阮兆祥鬧三角戀，但冇期，有晚拍場嗌交戲拍到天光，跟住《盛世人傑》又一早開工，冇時間返屋企瞓，咁多年都未試過。」
對於觀眾喜愛蓮子蓉，黎耀祥形容為始料不及：「出到街好多人叫我蓮子蓉，好似早排我去南京，喺香港機場免稅店班女仔成班圍埋嚟叫我蓮子蓉，好耐未試過，估唔到觀眾咁熱情，可以睇到電視劇嘅影響力係好犀利。不過，呢啲完全係劇本嘅功勞。」
雖然只是短短10多集，但黎耀祥已大呼過癮，特別是首次有機會跟關菊英合作拍嗌交戲，叫黎耀祥越嗌越痛快。黎耀祥說：「我同菊姐拍完第一、二日，已經同老婆講，話佢嗌交嗌得好好聽，可能佢唱開歌關係，音樂感好強，鬧人好似唱歌咁，我覺得佢掌握得好好，完全唔覺得煩厭，我哋拍得好順，排一次就可以好準，仲係一take過冇NG，我相信同菊姐如果繼續發展落去會有啲化學作用，希望將來再開第三輯嘅話，可以再同佢合作，再續未了緣咁啦。」
陳豪夠功力
跟一班老戲骨鬥戲，黎耀祥駕輕就熟，跟後生一輩合作，最欣賞那一位？黎耀祥說：「我幾鍾意陳豪，演員最考功夫係個戲唔喺你度，但你要存在，而存在得嚟你唔係搶，好難做㗎！老實講，後生嗰班得佢一個做得到，有啲做群戲都係hea吓hea吓，但陳豪梗會有啲嘢搞，就算一個wideshot，你會睇到佢同人唔同，但又冇離開個角色，既符合角色，又符合環境。陳法拉見工嗰場都做得好，一路喊一路做手語，令人感動，真係好考功夫，但有啲演員就算真眼淚喊，都未必感動到人。」
早前無綫有意跟黎耀祥簽訂經理人合約，未知進展如何？黎耀祥說：「同TVB傾過幾次，但有啲嘢好難解決，就係我簽咗之後實際收益仲少咗，諗諗吓冇乜着數，TVB好體諒我，話冇理由要我蝕底，所以都係維持現狀。講真，我𠵱家唔後生，早10年我就即刻簽，唔使計咁多數，但仔細老婆嫩，我唔可以唔為佢哋打算。」
搶先爆：君麗追蹤管家仔暈倒街頭
今晚播映的第19集《溏心風暴之家好月圓》，講述阿紅（米雪飾）開始使出奸計，佈局與Jo飽（夏雨飾）環遊世界兩年，Jo飽在壓力下無可奈何答應，但又不捨子女，心裏自責，要求子女向他吐出多年對父親最不滿的一件事，Jo飽聽後哭成淚人，酒醉後在荷媽（李司棋飾）家伴着子女過夜，卻被阿紅揭發。
湊巧阿紅前夫阿強（李國麟飾）突然出現，阿紅想還以顏色，遂故意讓家人知道她與阿強約會，令嫲嫲君麗（李香琴飾）嬲怒，為保家園，下令二人立刻照原定計劃環遊世界，阿紅奸計得逞。嫲嫲在街上看見最愛錫的孫兒管家仔（林峯飾），誤以為他拍拖，一邊通電話一邊上前追蹤，在天橋上突然心臟病發暈倒，危殆送院。
溏人心聲
最愛劇中金句--搓落人哋隻手
黎耀祥最喜歡的對白是有幕講述他當着Jo飽家人面前，大爆Jo飽與阿紅一早在餅店整餅時已經有染，他說：「搓搓搓（指麵粉），搓到落人哋隻手度。」
自選最愛場面--為荷出氣鬧Sa
荷媽放下20萬支票給Jo飽，着他不要控告Sa姨，豈料Sa姨還責怪荷媽，黎耀祥見狀遂與Sa姨吵架。祥仔認為這場戲掌握得很好，不會令人覺得無聊，及令整場戲變得更立體。
表現最好演員--鐵三角冇得彈
黎耀祥認為米雪、李司棋及關菊英，三個連場惡鬥，各有好睇的地方，無論語氣、聲音及情緒掌握也控制得相當好。