前日天氣酷熱，上山詩鈉卻相約大班圈中好友包括袁詠儀（靚靚）和郭富城等在跑馬地打邊爐，㷫烚烚慶祝44歲生日。同場到賀、因養尊處優發福的邱淑貞（豆斗）坐丈夫沈嘉偉的420萬法拉利新車出巡，富泰非常。
上山詩鈉前晚賀44歲牛一，在跑馬地明星食肆愉記打邊爐，出席好友包括沈嘉偉和太太邱淑貞、袁詠儀、曾志偉、郭富城、余文樂、阮兆祥、甄楚倩及7歲囝囝等，其密友俞琤未見露面，席上風頭則落在上山的10歲cutie囡囡Hilary身上，城城和志偉都對她錫到燶，不時攬着她合照。
眾星胃口甚佳，當中以志偉最大食，不是吃就是講gag搞笑。約於9時眾人合唱生日歌，然後繼續吃不停。其間素顏的靚靚與一名男友人一度離枱密斟，見她有點勞氣，頻頻指手畫腳，她發現被記者拍照後即擰轉身以背脊阻擋鏡頭，但返座位時又回復平靜神色。
樂仔等車勁𤓓
嘆足三小時後，眾人晚上約11時散band，豆斗拿着外賣，身穿寬鬆白恤衫，明顯身形變圓潤，育有兩女的她雖然仍很想生仔，但據知她只是發福而非懷孕。她偕夫婿沈嘉偉離開時，一面嬌羞，並登上丈夫本月以約420萬購買的黑色430Scuderia型號法拉利齊返寓所，豪氣不凡。
志偉和阮兆祥並肩離開時，問志偉有否送禮給壽星女？他笑說：「陣間你咪知囉。」二人偕一女伴齊坐他的保母車離開。甄楚倩離開時一見記者，即拖兒子快步走，城城則駕駛平治座駕獨自離開。至於上山和女兒就坐靚靚的順風車，壽星女對記者提問只報以微笑。眾星離開後，剩下近日狂黐沈嘉偉的余文樂等候司機駕駛保母車前來接他，但車輛遲遲未到，令他頗為尷尬。
靚靚傾偈勞氣
記者昨日致電靚靚，她表示前晚眾人為上山慶祝生日，氣氛愉快，她笑說：「志偉同甄楚倩講好多好笑嘢，帶畀大家好多歡樂。」提到她與男友人席間勞氣對話，她解釋說：「嗰個係我老公同上山嘅鐵腳friend，從事法律嘅工作，我哋傾偈慣性係咁，大大聲聲啫。」
採訪、攝影：娛樂突發組