轆Book：賣大包　五千蚊買八大裝備

大包，一籠頂籠兩個；HondaStream2.0，本身已經係RSZ運動版，夠大件夾抵食嘞啩？未算，加多套皮椅變Exclusive，裝埋Touchscreen音響系統、LED腳踏等八樣豪華裝備，你估要加幾多錢？皮幾兩皮嘢？Sorry，都話賣大包咯，盛惠$5,000吖！

記者：梁美甜
攝影：譚盈傑
模特兒：Enrica

大件夾抵食

唔好問點解，總之有便宜就應份貪到盡，今勻Honda確實賣大包，呢部Stream2.0RSZExclusive絕對大件夾抵食。
試諗，Stream2.0RSZ本身已經係運動型車款，有晒頭尾包圍、死氣喉、炭灰色合金輪圈，外形Sporty到震，售價$227,800；八月中旬推出嘅Exclusive版本呢？醒埋你尊貴組合，包括RSZ專屬真皮座椅、Parkingcamera、Touchscreen液晶體顯示屏連音響系統、LED電鍍門邊腳踏、窗邊及車廂電鍍裝飾、電鍍油門腳踏、地台冷光燈八大配置，盛惠$232,880，加減數好易計，數吓手指唔該，畀多$5,000咁大把啫，心水清都知，轉個Parkingcamera同皮椅都唔止呢個價喇。

■車頭設計與RSZ相若，配HID頭燈富線條及跑味。

■17吋輪胎配炭灰色軨，入彎穩定。

■駕駛席頂附有天窗，令空間感大增。

■雙圓儀錶板，簡單易睇全車資訊。

上斜有心有力

Honda自推出Stream後大賣，銷情直迫自家品牌嘅Stepwgn，事關Stream採用Civic嘅底盤平台，有1.8公升及2.0公升i-VTEC兩款，代理只引入2.0版本，馬力輸出達150匹及19.4kgm扭力，性能不致於叫做澎湃，但坐多幾個人甚至Full-load七個人，都一樣夠力水，最正係配備七前速CVT無段變速波箱，上大斜路有心有力，唔會窒窒吓，起步加速順滑。
新一代車款車身剛性同懸掛亦較之前優勝，秉承住Civic仔嘅操控感始終有保證，唯一要挑剔係車身高度有限，嬌滴滴靚女入座絕對舒服，姚明同王一梅呢？Sorry，請有心理準備頂頭頂腳啦。