早排於電視劇《銀樓金粉》、《師奶股神》等見到的小童星，不約而同出自「家燕媽媽藝術中心」，家燕姐04年開辦演藝學堂，培訓過千小演員向配音、DJ、演藝之路出發。前幾日更於荃新天地行畢業禮，學員傾巢而出，場面壯觀。當年說話還漏風就出身的小童星「雪家燕」，跟今日的學員童星借機發表「聯合星明」：「辦學目的只一個，我希望回饋社會，令小朋友活得更開心。」
記者：林佩婷
攝影：譚盈傑
昨日童星
爺爺大壽 表演踏星路
一次飲宴表演，家燕姐就踏上童星之路：「8歲時爺爺70大壽，我被師傅安排表演《貂蟬拜月》，點知俾電影製片見到就搵我演戲。初時爸爸好反對，好彩媽咪支持。」
「後來有次喺片場走廊練功，梁醒波突然行過問我叫咩名，嗰陣換牙講嘢有風，將自己個名講成『雪家燕』，波叔仲話個藝名改得好。咁啱隔籬廠有個小演員病咗，波叔就省起我叫我接替。入到廠真係嘩一聲，見到任劍輝、吳君麗、林家聲、靚次伯、陳寶珠、蕭芳芳……當時我同媽咪講，呢刻係我最開心嘅時候。」於是「雪家燕」努力學芭蕾、南拳北腿、粵劇等。
童星栽培童「升」
「自己係童星出身，所以諗到培養小朋友。」家燕姐04年開辦「家燕媽媽藝術中心」，「我唔係要佢哋做藝人，只想佢哋更有自信，自我提升，面對人際關係時能夠進入群眾，將來貢獻社會，擁有自己一片天。」
天空底下除有戲劇、配音等，還有普通話、英語戲劇、甚至連幕後工作也有得學：「課程最緊要實用，好似普通話成語班，我會將收錄好嘅教材拎去新加坡電台及當地小學播放，最近逢周日新城都有播，咁樣除學到成語知識，表演成果公諸於世亦感到滿足。」短短幾年藝術中心發展到新加坡，最近更打算在廣州設校，今天的「薛家燕」，視將學校帶進中國神州為終極理想。
今日童星
三歲被提名最佳女配角
才7歲的陳靖琳，演出經驗豐富。《師奶股神》中演商天娥女兒；電影方面有《師奶唔易做》；現時亦是《放學ICU》小主持。但最厲害的是原來她三歲多就已參演舞台劇，還被提名最佳女配角。陳媽媽話因機緣巧合：「佢姨媽參與劇團，當時有套《彌敦道兩岸》想搵個小演員，就叫我個女去試鏡，點知選中咗。」4年前見「家燕媽媽藝術中心」開辦就替她報名：「後來家燕姐推薦小朋友去試鏡《師奶股神》……」未講完都知，又中咗！
Bingo未必一定是好事，唔怕影響學業咩？靖琳反說成績更好：「睇劇本學識好多中文字，成日背稿記性都好咗呀！」問到做小童星會否自覺與眾不同，靖琳即搖頭糾正：「我只係個普通人，唔係童星。呢啲嘢好濕碎啫。」能講出這番話，算不算特別？
上堂學群體精神
又是《師奶股神》！劇中飾演靖琳哥哥的Martin許俊溢，今年12歲，同樣是藝術中心的學生。許太說Martin細細個就已經好鍾意Showoff自己：「佢小一已經參與英文話劇。」可惜有點自負，以為無人是對手。「幫佢報名上堂，令佢學習團結合作精神。」問Martin認同媽咪的話嗎？他也同意：「以前脾氣比較大，拍劇培養到耐性。」
精靈小DJ
很多時電視台或廣告公司都直接搵「家燕媽媽藝術中心」推薦小演員，家燕姐特地推介一個DJ課程，成績好的話有機會成電台小主持！
開課日期：9月7日（逢星期日，時間待定）
節數：10節（每節1小時15分鐘）
學費：$2,250
查詢：23427782