蔡卓妍（阿Sa）同羅志祥（小豬）噚日喺黃埔海逸酒店出席新戲《歲月情》發佈會，兩人喺兩對花仔花女陪同下出場，好似舉行婚禮咁。佢哋喺戲入邊會有一段浪漫嘅愛情，阿Sa話小豬一向形象搞笑，怕見到佢就忍唔住笑，拍唔到浪漫嘅氣氛喎。
問阿Sa鄭中基搞笑啲定係小豬搞笑啲？佢笑笑口話：「兩個都搞笑。」咁邊個靚仔啲？阿Sa話：「兩個都靚仔。」問佢會唔會同小豬有親熱鏡頭，佢話：「唔講得呀！」咁係咪同鄭中基就講得，因為一早親熱過？阿Sa撒嬌話：「乜呀？唔講唔答呢啲嘢呀！」
其實阿Sa同鄭中基拍拖已經係公開嘅秘密，問佢仲要考慮啲乜，點解唔公開？阿Sa話：「嘩！呢個問題好難答，我想人哋focus喺我工作，私生活唔回應，每一樣嘢到最後都會水落石出嘅。」
小豬視Jolin如姊姊
對於怕唔怕同小豬傳緋聞，阿Sa話預咗，小豬都有同感，問小豬係咪因為大家都心有所屬，因為佢都有蔡依林（Jolin），佢話：「我不知道阿Sa有男朋友，我都沒有女朋友，Jolin真的不是，她只是我的姊姊。」