北京奧運曲終人散，係時候對一班香港運動員論功行賞，雖然今次香港運動員攞唔到任何獎牌，但佢哋仍然有唔錯表現，有16名能夠打入比賽頭16名以內位置，而另外3名運動員亦打破香港紀錄。
恒生（011）噚日宣佈，「恒生優秀運動員獎勵計劃」將向香港18名奧運健兒頒發95萬銀獎金，為佢哋付出嘅努力嘉許一下，攞到第4名到第16名嘅個人及團體運動員，分別獲頒5萬銀同10萬銀，當中包括單車手黃金寶、乒乓孖寶李靜同高禮澤，至於打破香港游泳紀錄嘅3名女泳手就獲得2萬銀。
今屆京奧，恒生副董事長柯清輝當然有全程昅實，佢話最印象深刻嘅係陳敬然喺滑浪風帆賽度喺第11輪以第一名衝線，仲有高禮澤勇挫上屆奧運冠軍柳承敏。