港股急彈似足撐竿跳，仲係接近最高收，恒指大升712點，重上21000點大關，收21104，只差十幾點就收復10日線（21118），期指尾段氣勢仲好勁，搶上21190高收，大升809點，更變番高水。大市由頭升到尾，力度頗強，短期有機會見底回升。
恒指由7月24日的高位23369回落，到上周四的20350，共下跌3019點，若反彈0.382及0.5計，恒指可回升上21503及21859點。大市暫時只能以反彈視之，大價股行先，股仔亦會升番一轉。跌得多嘅，反彈亦會好急，可以揀先。
華潤勵致（1193）再轉型，今次對象係燃氣，向母公司華潤集團收購項目總值38.15億元。過去幾年，集團頻頻「變身」，今次轉型，「晒士」咁大，日後仲會陸續注資，應該找對方向了。公司已決定改名「華潤燃氣控股」，目標係發展成華潤集團屬下燃氣業務的旗艦。
勵致將大比例供股，1供4，每股供3.42元，集資38.7億元，用以支付收購華潤燃氣的代價。宣佈供股前，勵致股價已聞風先跌，由8月初的6.35元，大幅下挫到4元水平。噚日復牌，更一度跌破供股價，收3.55元，再跌0.45元。收市後，派中期成績表，08年上半年盈轉虧1720萬元，意料之內。
母公司將陸續注資
母公司持有勵致68.83%股權，除承諾按比例供股外，並悉數包銷新股，擺出姿態係多多益善，亦充份顯示對公司前景的決心。勵致轉型嘅係高速發展的城市燃氣行業，又有大股東「照顧」，現水平已值得吸納，但要揸長線，始可以獲厚利。
華潤燃氣目前在7個城市經營燃氣業務，包括在成都、富陽、淮北、臨海、蘇州及無錫從事城市燃氣分銷，又在成都、南京及無錫經營壓縮天然氣加氣站，亦在富陽、蘇州及無錫從事瓶裝液化石油氣分銷。今年上半年盈利1.63億元，保證全年盈利不少於2.5億元，收購PE為15.3倍。
華潤燃氣07年獲利1.94億元，08年保守估計已有近3成增長，由於燃氣係高速發展行業，估計高增長可維持，最值得憧憬係母公司尚持有22個中國其他城市的燃氣項目，日後會陸續注入，勵致亦會壯大成逾百億元市值的大企業。