季前由熱刺加盟新特蘭嘅占邦達真係好鬼大膽，明知領隊堅尼最憎人遲到，竟然喺上周六作客熱刺前一粒鐘先蒲頭，搞到堅尼火到連後備都唔預佢。近年新特蘭棄將米拿、史杜基斯同富納等都試過玩遲到，堅尼都二話不說將佢哋即時掛牌。好心占邦達你生生性性啦，啱啱先初嚟埗到，得罪堅尼真係冇得傾㗎！好彩呢位領隊肯原諒你一次啫。