德國馬術名將伊莎貝（IsabellWerth官方譯名伊莎貝爾．沃思）與荷蘭馬術女皇安琪（AnkyvanGrunsven官方譯名：安基．范格林斯芬）係盛裝舞步賽之歡喜寃家，前者往往有既生瑜何生亮之嘆。伊莎貝贏過此項比賽嘅九二年巴塞隆拿銀牌，九六年阿特蘭大金牌，二○○○年雪梨銀牌，二○○四年因為搵唔到適合馬匹，無緣參加雅典奧運；至於世界盃、歐洲盃，佢亦攞過金牌、銀牌，自一九九一年起，今年三十八歲嘅伊莎貝每次參加大賽嘅話，一定係戴金戴銀。
安琪今年四十歲，九四年就贏世界大賽金牌，九六年奧運輸畀伊莎貝得銀牌，之後○○年、○四年奧運得金牌。今次○八年北京奧運嘅馬術賽，嚟到香港，又係遇番老對手伊莎貝，在頭兩輪比賽嘅累積得分落後0.24分，八月十九日晚之第三輪決賽中，伊莎貝嘅胯下名駒Satchmo曾犯大錯，但裁判仍給予高分78.1，平均分去到76.65，安琪係最後一位出場，一定要取得78.35分或以上。
安琪嘅自選音樂"DanceofDevotion"，與伊莎貝之自選樂曲"HymnofEmotion"相映成趣，淨係睇曲名，已知兩位女士嘅情感、情緒以及佢哋想在自選動作中想表現那一類藝術層次。安琪得到荷蘭頂尖音樂家嘅支持，呢首"DanceofDevotion"就係由荷蘭鋼琴大師WikiSoerjadi創作嘅。在奧運贏一面金牌，非常不易，誇張啲講，係要舉國支持至得。安琪有幸，搵到一匹「舞術馬王」Salinero，此晚一出場，氣勢懾人，踱步輕巧，快步勁猛，原地踏步馬身紋風不動，高抬步徐疾有致兼且神情「招積」，做定點旋轉收發自如，左旋與右旋構成一個鏡子形象（mirrorimage），跟隨樂曲節拍，馬步可快可慢，可動可靜，慢步時如詩人沉思，快時如保特（百米飛人）起動，而這一切舞步，由誰指揮呢？全程（約八至九分鐘），只見安琪面部表情寬容，腰部挺直，手執韁繩無大動作，究竟佢如何指揮隻馬，還是Salinero自己有馬性識跳舞？要睇DVD慢鏡研究。如此表現連外行人左丁山都知道比伊莎貝更好，安琪與Salinero企定向裁判敬禮後，全場掌聲雷動，荷蘭人揮舞國旗，贏金牌嘞！