中國成為今年奧運大贏家，金牌數目超英趕美。運動員除咗攞獎牌，仲有唔少組織會畀獎金，你估呢啲獎金使唔使交稅呢？
《羊城晚報》報道有專家解釋，原來使唔使交稅要睇吓筆獎金嚟自邊個單位，只有「省級人民政府、國務部委和中國人民解放軍以上的單位、外國組織、國際組織頒發的科學、教育、技術、衞生、體育、環境保衞等方面的獎金」，先至可以免交個人所得稅。至於其他獎金收入，會根據《個人所得稅法》規定交稅。
換言之，今屆奧運得獎運動員嘅獎金，由國家體育局、各省級政府等省級以上單位所派先可以免稅，其他省級以下單位或者企業畀嘅，一律要按20%稅率交個人所得稅。咁金牌得主收到「霍英東體育基金」送嘅1公斤黃金，都要少緊幾両。