由徐熙媛（大S）、古天樂同張家輝等主演嘅電影《保持通話》，噚日喺荃灣舉行電影預告片首播會，大S航班延誤兩個半鐘，搞到佢喺機場趕嚟現場時好狼狽，既忙化妝，又要喺行李箱中拎衣服出嚟洗熨更換，最慘係一邊黐眼睫毛，一邊俾途人邀影合照，非常搞笑。
大S同古仔首次合作，原來噚日先係第二次碰面，所以佢哋直認唔熟，就算片中嘅談情戲，都只係靠電話傳情，親熱戲更加欠奉。大S片中飾演單親媽媽，佢話曾經親眼目睹三次生仔過程，所以唔會考慮生BB，佢話：「我妹妹有兩個小孩，姐姐有一個，我是超級保母，自己不想生，雖然我不怕血，但是我不想經歷這些過程，因為太可怕及非常恐怖，我只是擔心她們的安全才陪入產房。」
古仔自揭飛車史
古仔喺《保》片中，多屬個人戲份，要邊揸車邊傾電話邊做戲，原來佢已經8年冇揸車，但戲內佢全程冇用替身，仲有唔少危險鏡頭，所以電影公司為佢買咗幾千萬保額嘅保險，佢話：「我有日瞓醒就唔想揸車，冇乜特別原因，𠵱家屋企有車都係屋企人用，以前揸車都試過瞓着，又開過快車，最犀利係用七分鐘由清水灣邵氏返到何文田。」