承接上一輯《溏心風暴》氣勢，以原班人馬炮製的《溏心風暴之家好月圓》播出後叫好又叫座，李司棋、關菊英、夏雨、米雪和李香琴一班老戲骨固然演得入戲，後生一輩如林峯、陳法拉和楊怡的演技也不容忽視。對於觀眾的讚賞，飾演阿月的楊怡卻大彈自己拍攝時狀態甚差，十分「抵打」。 撰文：何慧斯
無綫劇集《溏心風暴之家好月圓》本周劇情將步入另一個高潮，飾演「Sa姨」寶貝女路家美的徐子珊將會出場，施展渾身解數色誘「阿卡」陳豪，令暗戀阿卡的「阿月」楊怡醋意大發，不知如何是好。
日前楊怡接受訪問，談到劇情發展，儘管坊間對這段三角戀有不同揣測，但楊怡堅決不肯透露半點口風，她笑說：「監製（劉家豪）要賣個關子唔准我哋講，我只可以講大家會睇到想要嘅嘢，劇情逐步開始會明朗化，又會有生離死別，結局會出人意表，總之唔止圍繞爭奪家好月圓嘅招牌，帶出紅姨一幫人嘅陰謀，仲會有好多精采場面。」
「好似未盡努力」
雖然不少觀眾讚賞楊怡在《家好月圓》的演出，不過她卻笑言自己「抵打」，她說：「我拍《家好月圓》嗰陣，同一時間拍緊《勝雪鹽棧》，加上《家好月圓》趕住出街，每日都要拍好多個場口，雖然我都好畀心機去做，但係覺得自己狀態好差，試過拍緊戲時都瞓着咗。我只可以話整體OK，但仲有好多唔滿意同不足嘅地方，好似未盡努力，聽完觀眾咁講，我覺得自己更加『抵打』。」
不過，楊怡不忘賣花讚花香，她說：「雖然成個故事有好多人物，但故事發展又唔會好亂，大家嘅戲份都好平均，又會有個別發揮嘅機會，好似我今次嘅角色，唔單止同菊姐有打交戲，今次仲唔使俾人恰，同以前飾演楚楚可憐嘅角色有好大分別。」
讚鍾嘉欣表現好
上一輯《溏心風暴》在去年的「萬千星輝頒獎典禮」中囊括多個大獎，今年《家好月圓》一出，已經有預測會成為大贏家，更有說此劇為林峯鋪路做視帝，對此楊怡說：「阿峯的確做得唔錯，不過𠵱家講呢個問題似乎言之過早，事實上距離頒獎禮仲有一段時間，仲會有劇集推出，好似《珠光寶氣》同《搜神傳》，但我對呢套劇有信心，鍾嘉欣都做得好好呀！咁我會投自己一票，唔好長他人志氣，滅自己威風嘛！」
攝影：葉君海 化妝：馬仔
髮型：BenLam（ILCOLPO） 服裝：GRAB
搶先爆
啞女情深打動Kelvin媽
今晚播映的第18集《溏心風暴之家好月圓》，講述阿紅（米雪飾）故意服降血壓藥令身體虛弱，並受刺激暈倒，讓家人擔心。另一方面，阿慶（陳法拉飾）和Kelvin（楊天經飾）舊情復熾後以為可以名正言順拍拖，原來更添波折，Kelvin母親（韓馬利飾）為怕阿慶成兒子負累，刻意約阿慶家人吃飯，出言棒打鴛鴦，公然叮囑兒子：「下世投胎唔好做長期病患者。」之後藉故離席找荷媽（李司棋飾），還向荷媽提出過份請求：「我係唔會畀個仔娶啞妹。」
荷媽聽罷，向Kelvin母親解說為人母的心情，最終令她開竅，讓她明白兒子和阿慶是真心相愛，知道自己的行為過份後，她還特地學手語向阿慶和其家人道歉，場面感人。另外，于素心（鍾嘉欣飾）和凌至信（黃宗澤飾）的一段情今集也會有伏線。
溏人心聲
最愛劇中金句 鬧情敵Devil
楊怡最喜歡的對白是，有幕阿月和Sa姨吵嘴，一怒下她罵Sa姨「罵人為樂」，怎料Sa姨卻聽錯，還怒說「你話我賣淫為樂？」另一個她最喜歡的是鬧徐子珊：「Devilwoman,shameonyou」
自選最愛場面 匿電話亭喊
阿月覺得自己不是家庭一分子，於是自把自為搬出去住，誰料失戀又失業，荷媽（李司棋）得悉後四出尋找她，但阿月覺得沒面見家人，遂匿在電話亭入面喊。
表現最好演員 個個都好好
楊怡：「我覺得個個都做得好好呀，好難揀一個人，但如果真係要揀，我會揀編審，因為佢幫套劇製造咗好多精警對白。」