楊其龍（Gilbert）前晚在其夜店dragon-i慶祝41歲生日時，秉承一貫playboy性格，以已故男星希思萊杰在《蝙蝠俠-黑夜之神》中的小丑造型亮相，認真大吉利是。至於生日願望，Gilbert表示最痛錫的80多歲嫲嫲近日因老人病入院，希望她早日康復，長命150歲，並希望明年生日前能成家立室，盡快生BB給嫲嫲抱。
楊其龍前晚在他有份開設的中環夜店dragon-i，舉行41歲生日派對，現場以七十年代為主題，貼上不少Gilbert扮鬼扮馬的電影造型如哈利波特和盜墓者等海報，秉承他一貫的playboy性格。
不怕唔老利
到場賀Gilbert的包括母親任漫齡、胞姊楊諾思和楊黛思，老友如吳積遜江欣燕夫婦和Gordon等都扮鬼扮馬，一向扮嘢出神入化的江欣燕更以跳水公主郭晶晶的奧運金牌look示人，維肖維妙，壽星佬Gilbert則以《蝙蝠俠-黑夜之神》（TheDarkKnight）已故男星希思萊杰（HeathLedger）的小丑造型示人，認真大吉利是。
記者笑Gilbert生日以小丑look示人，認真唔「老利」，他說：「點會唔老利，佢好有型，做戲又叻，奧斯卡佢攞梗。」問他的生日願望，他說笑：「正經做好生意，同埋希望下年生日一定結到婚。」之後，Gilbert切生日蛋糕時，則許願希望正在留院的嫲嫲早日康復。
腳腫數星期
問Gilbert嫲嫲的近況，他說：「嫲嫲同Cindy（指楊諾思）係我最鍾意嘅兩個女人，嫲嫲入咗院兩個禮拜，老人病，隻腳腫晒都幾個禮拜，噚日（即大前日）都有同佢食飯，生日願望係佢快啲好番，希望佢有150歲。」他又透露十分痛錫嫲嫲，他說：「細細個佢對我好好，10年前我喺屋企胃痛，嫲嫲冒住雨帶我去醫院，所以都希望快啲結婚生BB，有個曾孫畀佢抱。」
此外，楊諾思透露送了一隻杯給Gilbert，她說：「隻杯寫咗讚佢好有才華，其實我最想佢入教會，佢心地好善良。」
採訪：JessicaNgan
攝影：EdwardChou