沙田奧運馬術場地舉行盛裝舞步個人賽之大獎賽自選動作（GrandPrixFreestyle）決賽，精彩咯，左丁山一世人第一次（其實在八月九日之前未在現場睇過馬術賽）睇到咁精彩，咁難度高嘅馬術。鄧小平話香港九七回歸後可以馬照跑，舞照跳，想唔到在二○○八年八月十九日晚上，我哋可以親眼見到「馬跳舞」，只能講一聲，嘆為觀止。
參加決賽嘅有十五名riders（以下稱之為馬術選手，簡稱選手），荷蘭、德國、瑞典、美國、丹麥各佔兩名，英國、加拿大、俄羅斯、墨西哥、芬蘭各佔一名，全係世界上頂尖兒馬術高手。事前知道初賽嘅累積成績，德國伊莎貝（IsabellWerth）以75.20分領先有「荷蘭女皇」之稱嘅安琪（AnkyvanGrunsven）嘅74.96分，第三位係德國HeikeKemmer得72.76分，因計分計到小數點第三個位，好難出現分數相同嘅情況，故此金牌係伊莎貝與安琪之爭。專家靚女C話畀左丁山聽，安琪係世界公認嘅自由動作之王，伊莎貝要使出渾身解數先至可以阻止安琪後來居上，剛好安琪排在最後一位，第十五名出場，如果伊莎貝表現得特別好嘅話，安琪會受到極大心理壓力。
盛裝舞步初賽時，因為不用自選音樂，及遵從指定動作，唔知道盛裝舞步可以好到點。呢晚就唔同咯，啲選手自選音樂配合，自選動作，觀感特別唔同，譬如第一位出場嘅係丹麥公主Nathalie，佢選用城西故事名曲Tonight（總結果排第十五），英國選手Emma選BeeGees嘅勁歌及FlashDance，隻馬好似識得跳「樂與怒」咁款，做高抬步時，隻腳抬高，識得震一震先至落地，墨西哥選手選用墨西哥民族音樂，以強勁結他聲音配合馬匹做出伸展步快步，來顯示馬匹強烈嘅氣勢，天衣無縫。但所有選手即管努力到極，幾位取分超過72分，但一到伊莎貝出場，即時相形失色，伊莎貝做出一連串高難度動作，馬匹腳步與音樂節拍配合到一絲不苟，雖然隻馬一度受嚇犯下大錯，但裁判欣賞伊莎貝之技術與藝術表現（artisticpresentation），仍然畀佢78.1分，令伊莎貝領先群雌。安琪如何反先呢？