香港作為奧運協辦城市，馬術比賽前後雖然發生過場館設施條條fing事件，港九多處地方又出現過詐彈疑雲，仲有奧馬保安投訴工作待遇奇差。不過最終都有驚無險，比賽順利完成。
傳煲呔搵佢重返政府
奧馬公司行政總裁林煥光噚日上電台接受訪問時心情勁靚，仲自爆最辛苦係比賽開始頭三日，因為賽事喺朝早同深夜，一場接一場咁舉行，啱啱完咗一場比賽，就要即刻開會檢討，接住又要準備第二朝嘅賽事。林煥光喺嗰三日期間，夾夾埋埋只係瞓得四個鐘。
奧馬比賽初期唔少觀眾覺得悶中途離場，林煥光就話呢啲都係預計之內，皆因盛裝舞步賽就算喺歐洲入場率都唔高，佢覺得香港有三成觀眾睇到賽事結束，都算唔錯。至於國家副主席習近平參觀雙魚河場地時發生咗場館冷氣喉下墮條條fing事件，林煥光就話當時自己冇乜壓力，因為單嘢百分百屬意外，基本上唔係佢哋失誤而引致喎。
八方聽聞，既然中央好重視嘅馬術比賽都過關，煲呔有意搵佢喺年底重返政府，接替孫明揚做教育局局長，唔怪得佢噚日咁風騷。