近排太陽猛曬，令到皮膚美白產品大派用場，但係好多人都忽略咗防曬要「內服」同「外敷」，做齊先夠完美。所謂內服其實係指要食多啲可以幫助身體抗曬同對抗皮膚衰老嘅食物，有啲人會叫呢啲做「SPF（SunProtectionFactor）食物」，好似番茄、檸檬、奇異果、西蘭花、豆腐都係有效嘅防曬食物。
提高抗氧化能力
唔使我醫神話你知，好多人都知道陽光入面嘅紫外線係皮膚大敵，紫外線會刺激皮膚產生大量氧化自由基，破壞皮膚嘅細胞組織，加速黑色素形成，令皮膚變得暗啞、粗糙同無彈性。
台灣國泰醫院嘅皮膚科主任醫生胡淑玲最近喺網上介紹，防曬食品可以提高身體抗氧化能力，幫手清除氧化自由基，其中食多啲有美白之王稱譽嘅維他命C就最緊要，含高C嘅蔬果有好多，值得推介有檸檬、橙、士多啤梨同甜椒，每日食兩至三份，可加強皮膚抗曬能力。
除咗維他命C之外，就要數含高抗氧化物嘅食物，抗衡紫外線嘅刺激，其中番茄嘅茄紅素有好豐富嘅抗氧化物，有外國研究發現每日食半個至一個番茄，曬傷嘅風險可減40%。雖然紅蘿蔔、南瓜、木瓜都有豐富嘅抗氧化物，但胡淑玲警告呢類「黃黃哋」嘅蔬果，食得太多會令皮膚變黃，所以就算要靚，都唔可以食得太多㗎。
大豆類食品看似同防曬或者皮膚健康無乜關係，原來大豆含豐富植物雌激素，可以幫助女士補充女性荷爾蒙，有抗衰老嘅功效，食得多皮膚會細嫩啲。
blog主：醫神