京奧今晚正式閉幕，本屆賽事由於劉翔受傷退出，令開幕禮持旗手姚明，成為中國最大嘅體育明星。根據最近公安部嘅資料，全國目前有近6,000人叫姚明，你話係咪紅遍全國呢？
資料顯示，全中國約有420多萬人姓姚，其中5,961個叫姚明，仲有681個係女兒身！20至29歲嘅姚明最多，高達1,509人，唔知幾多係因姚明而決定改名呢？1至9歲當中，亦有869個，睇嚟好多爸爸媽媽，都希望個仔第日可以成為中國「揸旗人」喎。
未紅前被錯認係大郅
大紅人姚明𠵱家無人不識，不過未紅前都有面懵經歷。日前佢同易建聯、王治郅同李楠接受中央電視台訪問時，就自己踢爆話1995年參加全國青年聯賽，一次落街買杯麵，遇到球迷上前攞簽名；由於嗰次係佢第一次同球迷簽名，於是屏息靜氣慢慢簽，生怕潦草得滯對方睇唔明，咁細心認真抵讚！
點不知，個球迷得手後滿心歡喜，隨口就講咗句：「唔該晒，王治郅！」搞到姚明當堂由條頸一路充血上塊面度。唔知嗰位球迷當時有冇因為唔知姚明係乜水，轉頭將個簽名掟落垃圾桶呢？係就慘嘞，大家都知羽毛球選手林丹隻臭鞋都炒到幾十萬，當年嗰個姚明「處子簽名」，起碼都值百萬啦！
名聲越大應酬越多，姚明返美國備戰NBA新球季前，仲有兩個婚禮要參加。隊友劉煒同朱芳雨都喺9月告別王老五生涯，兩人已經通知姚明及易建聯等國家隊隊友早啲到。其實姚明上季運氣麻麻，季後賽前先來重傷，差啲連京奧都打唔到；既然新球季要到10月底先開鑼，姚明大可以飲埋喜酒，當做冲喜吓先再戰NBA，話唔定可以衝擊冠軍指環㖭！