奧運今日閉幕，不過盛事氣氛唔會咁快結束，因為中國金牌運動員幾日後就嚟到香港，相信全港市民都渴望親睹健兒風采，大家最想見到嘅梗係「跳水皇后」郭晶晶啦，據講佢場表演門券，網上炒價最高，真係有錢都買唔到，一票難求好矜貴。
郭晶晶受香港人愛戴，香港青年協會喺奧運開幕後，做咗個民調，訪問咗300幾個青少年，結果發現晶晶成為最新𡃁界女神，有43%後生仔話最欣賞嘅中國運動員係郭晶晶，遠遠拋離第二位嘅欄王劉翔，有25%人話最欣賞佢，負責調查嘅機構話，結果顯示劉翔雖然因傷退出，唔能夠衞冕金牌，但仍然係後生仔偶像；至於第三位，就係體操「全能王」楊威，佢攞咗多個金牌，今次卻要攞「銅牌」，以22%屈居第三位。
晶晶樣子可人，欣賞佢跳水真係賞心悅目，令人陶醉，晶晶向來係萬人迷偶像，成為新𡃁界女神絕不出奇，幾年前已經傳佢可能加入娛樂圈，進軍演藝界，如果成事，相信𠵱家所謂𡃁界女神Angelababy、JaniceMan等隨時相形見絀，而且係人都知晶晶後台十分硬淨，唔入娛圈都有機會入豪門，一般女星冇得比。
呢個調查仲發現青少年睇奧運，最感動係睇開幕儀式大場面，38%人話好感動，不過調查冇問邊個環節最令人感動，係李寧飛天點聖火，定係林妙可出場、楊沛宜代唱嗰一幕呢？如果再做民調，結果可能唔一樣，DoDo姐發火鬧人嗰一幕，可能先係最令人感動，佢咁真情流露，肯定唔係幕後做假，比起為咗國家形象、利益而將兩個細路女擺上枱嘅所為，真係感人得多。
也重視新聞自由
中國運動員成績理想，三成二受訪者話最關注獎牌榜形勢，日夜昅實中國健兒成績，運動員交出漂亮成績表，冇令大家失望，亦有24%受訪者話最關注記者採訪京奧自由，即係話香港後生仔除咗想國家好，亦好重視新聞自由，沒收回鄉證、阻撓記者採訪呢啲小動作，北京都係唔好再做嘞。
mailto:[email protected]