喺電影《跳出我天地》（BillyElliot）入面，主角有一次參加拳擊訓練時，睇到芭蕾舞班練習，意識到自己屬於舞台而非拳台。真人版故事搬咗去京奧，只不過情節啱啱相反。前日贏得男子中量級拳擊金牌嘅英國選手廸加利（JamesDeGale），細個熱愛舞蹈，差啲成為舞蹈家，但搵清楚目標後，最終用拳頭「擊出我天地」。
幾年前睇呢齣電影，記得最經典、最激盪人心嗰幕係主角老竇得知個仔獲舞蹈學校取錄後，開心到擘大個口跑出街慶祝。前日廸加利贏完金牌後，佢老竇利萊一樣擘大個口，不過係大爆個仔細個鍾情跳舞。「我知佢唔想我講佢過去，但我就不吐不快。佢細個好女性化，對腳好靈活，愛跳舞愛到發燒，爵士舞、現代舞同的士高瓣瓣掂，細個仲同個妹一齊去舞蹈學校讀咗兩年，簡直係《跳出我天地》嘅真人版──不過係相反。」
老竇買中愛子81倍奪金
「當全家人都支持佢發展舞蹈事業，佢爺爺有一次帶佢去睇人打拳，結果一睇就迷上，轉軚學打拳。無論佢揀邊條路，我哋都撐佢，終於有日龍穿鳳。」利萊越講越興奮，再爆自己唔止精神上支持個仔，仲用行動支持──京奧前已落注買咗個仔贏金牌：「賽前佢贏金牌嘅賠率係81倍，雖然係冷門但我照撐，最後贏幾多？唔話你知，總之多過100英鎊（約1,445港元），少過10,000英鎊啦，哈哈。」
既然佢老人家講得出自己個仔唔想玩踢爆，點知就越講越多，至怕講多錯多父子都無情講，因住電影入面擘大個口嗰幕重現，不過係仔打老竇，俾個仔出拳打到口擘擘啫。