《蘋果批Online》逢星期一、三、五晚上九時開騷
Click入http://pie.appledaily.com收看
歡迎透過web-cam即時發表意見
或致電29908648安排親身上場
電郵：mailto:[email protected]
網誌：http://pieatapple.wordpress.com
九龍東六張名單，有四張可以歸類為泛民陣營，其中民主黨就佔兩張。雖然份屬「同門」，但佢哋喺《蘋果批》選舉論壇入面嘅辯論，激烈度仍然相當可觀…… 主持：高明輝 楊卓華
民主黨「棄胡保李」？
胡志偉：
呢條（問題）自己一路個心都想問，其實今次嘅選舉，我同你分開兩條隊，一路大家都盡力去做。不過我有時睇報紙，我唔知係（咪）人哋寫歪咗你嘅說法，成日都講去到尾（民主黨）要「棄胡保李」。其實你啲民調都咁高，你唔使咁擔心，講呢番說話其實唔係咁好，我有少少唔開心。
李華明：
我諗呢啲係傳媒啦！我自己（做了議員）十幾年，傳媒經常都會問你會唔會棄乜保乜……成日都會做呢啲文章，我諗佢哋覺得我哋呢區好沉悶……我從來都唔要求棄乜保乜，不過傳媒就覺得可以寫吓。如果胡志偉（支持度）高啲，咪「棄李保胡」囉！
舊區重建快定慢？
李華明：
觀塘市區重建等咗十幾廿年，相信大家都支持，啲居民等咗好多年，想快啲改善環境。𠵱家市建局提咗一個三百億嘅重建計劃，你哋（公民黨）團隊對呢個計劃有咩意見？
黃鶴鳴（梁家傑名單成員）：
同一般地產商（比較），佢（市建局）重建好古怪。地產商照計就係先賠償、後規劃。佢𠵱家掉番轉，先規劃、後賠償……佢應該係先賠咗畀啲街坊。𠵱家街坊我諗最關心係（個賠償）。
李華明：
你要清楚個法定程序，因為嗰個規劃要透過城規會賣憲報，又透過行政會議，曾蔭權通過咗，先可以進行。即係唔可以（先）賠咗錢，因為你冇一個法定嘅機制。
真係可以打走陳鑑林？
李華明：
（在電視選舉論壇）胡志偉就叫（另一候選人）陳鑑林退選，陶君行就話打低佢嘅票，踢走陳鑑林，好漂亮嘅口號，但有乜辦法真係打走陳鑑林？
胡志偉：
我做選舉咁耐，有一個心態：唔好當啲選民係儍嘅……選民都睇到佢（陳鑑林）根本唔使做立法會議員，又唔使監察政府施政，（政府）吹雞就歸隊。佢最叻都係派嘢，小恩小惠……咁失職，（所以應該要）退席！
陶君行：
你《蘋果日報》委託港大做嘅民調，樣本得二三百，我讀社會科學，二三百嘅誤差，係正負7%到8%，陶君行（支持度）可能係百分之十一，又可能係零，呢啲調查其實冇意義，不過你有政治目的，要幫某啲人做勢……（我）唔接受（這個民調結果）。（編者按：陶君行有關言論存在謬誤。除蘋果外，有關港大民調委託機構尚包括《明報》、《南華早報》等；「滾動式」民調樣本總數隨時間不斷增加；以8月16日至20日為例，平均樣本316人，陶君行支持度4.5%，統計學上誤差正負2.3%。）
想為立法會帶來乜嘢改變？
黃鶴鳴：
保皇黨已成為政府喺議事堂嘅投票機器……先會出現梁展文事件、副局長事件。所以今次選舉非常重要，將會決定嚟緊四年，立法會究竟仲有冇能力，有效制衡政府、監督政府。
陶君行：
我一路都求change，99年我喺民主黨已要求有最低工資，今日佢都轉軚跟我；我哋喺03、04年時要求董建華落台時，佢哋話我激進……我哋社會民主連線，維護中下階層、弱勢同基層利益、從來都唔退縮……
註：《蘋果批》論壇亦有邀請同區黃國健名單、陳鑑林名單，但有關名單均未能派員出席。
