美國女子排球隊京奧摘銀，中國教練郎平係最大功臣。由於合約寫明教到京奧為止，咁啱中國女排教練陳忠和可能引退，於是中國記者問佢會不會執教中國隊。郎平聽到即刻擰頭，仲話喺美國教波冇壓力，言下之意寧願繼續教美國隊。點解咁決絕？原來郎平試過畀人屈向地方政府攞錢起排球設施，佢自此決定一定唔喺中國做官，國家隊教練非必要都唔考慮。