天大石油管材（839）插到貼近1年低位，股價走勢又係同強勁嘅業務增長背道而馳，天大要買。天大主打石油油井管及油氣化工管製銷。今年第一季，集團產品銷量同比增加咗14%，平均價格亦上調28%。去到第二季，天大總產量升咗近33%，產品平均售價，更加大幅調高咗40%。產量提升之餘，兼可以提價，應該完全抵銷晒原料成本高企問題，天大業績，應該靚爆鏡。
又天大已經成為中石化（386）、中石油（857）及中海油（883）幾家龍頭嘅合資格油管生產商。拍得住龍頭，中線業務亦有保證。非常保守計數，天大08年度（12月底止）純利係咁意增長20%，到2.2億銀人仔，預期PE得4.6倍。個市唔配合無得講，天大就算現價（1.54元）翻半番到2.30元，預期PE仲係得6倍幾，仲係抵到爆。
東方表行長線收集
股票鐘擺原理，由一個極端走去另一個極端，東方表行（398）屬其一，又係殘到爆，要開始長線收集。東方表行往績PE跌到落4倍幾，適逢中港經濟整固期，保守計數，09年度（3月底止）純利只係增長10%，到1.72億銀，連配股攤薄效應計，預期PE都係keep住4倍幾。
隨住祖國經濟再衝刺，加埋集團擴展，2010年度打後，東方表行純利可以一支箭。以集團09年度預期PE7倍做目標，現價（2.32元）都講緊要升62%到3.77元。