北京奧運終於曲終人散，敏妮執筆時，正喺度等緊睇奧運閉幕禮。講開京奧閉幕，之前好熱炒嘅奧運紀念鈔，據聞上個禮拜已經跌破138蚊發行價，以炒新股術語，家陣隻股已經跌破招股價，潛緊水！除咗香港嘅奧運紀念鈔潛水，澳門嘅奧運紀念鈔據講亦都喺京奧閉幕前夕，跌穿88蚊澳門幣嘅「招股價」。相反，大陸發行嘅人民幣奧運紀念鈔，家陣個價仲企得幾硬，保持喺1000蚊人民幣左右。
奧運鈔見頂回落
香港同澳門嘅奧運紀念鈔炒得嗰1個月左右就已經見頂回落，冇得炒，專家認為，咁係因為港、澳奧運紀念鈔一來唔係普通流通貨幣，而且區域性強，仲要用溢價發售，加上炒作過度，經過一輪急升之後價格自然會大幅回落。啲專家估，大陸發行嘅人民幣奧運紀念鈔跌價係遲早嘅事。
睇完篇報道，敏妮第一時間諗到係樓市。好多樓盤其實地點唔係咁正，但發展商溢價推盤之餘，搵啲炒家造勢，炒風營造得起，咁個盤就賣個滿堂紅。當然真正炒家知道幾時獲利，但一般投資者見人哋炒得咁爽又去跟風，最後通常都係接火棒。
用家毋須高價搶
不過，話又分兩頭，炒風形成開始已經有分析報道話，泡沫遲早爆，只係啲參與炒作嘅人，以為自己會喺泡沫爆之前搵到人高價接火棒。甘心好似啲公公婆婆咁，排成朝早賺幾百蚊就滿足嘅人唔係好多。對於真正奧運鈔收藏家嚟講，點會唔知奧運鈔真正值幾錢，所以都會等個價回落返合理水平先買。
套用喺樓市上，將軍澳堆填區同天水圍樓盤值幾多錢，心中有數啦，真係想買嚟自住，點會高價同人搶，係都等炒風過後先睇吓有冇平貨執啦。
http://wanmanli.com/blogs/