飛機師一向畀人好型嘅感覺，影星王敏德Michael更加係又型又靚仔。有幸坐到佢揸嘅直升機相信唔暈機浪都一定暈機師浪，但新東候選人龐愛蘭似乎定力好夠，噚日同Michael一齊衝上雲霄後仲好清醒，講得出坐直升機無非係想喺空中視察邊境河套區嘅最新形勢，以便深入了解河套發展，唔會流於齋噏咁虛無。
身為航空青年團副主席嘅龐愛蘭話，同身為愛心大使嘅Michael相熟。佢大讚Michael好人，成日都載青少年喺上空考察。輪到自己開聲請佢載自己都冇托手踭，真係唔話得。今次直升機之旅開支高達五位數，會計入選舉經費；好彩Michael唔當做戲，否則計埋演員費仲和味。