以為京奧有大批旅客訪京，刺激北京旅遊業？打錯算盤！由於保安規管嚴格，北京旅遊業未如人意，以為穩贏嘅酒店業，入住率仲衰過舊年同期，趕熱潮嘅富力地產（2777）淪為輸家。
北京市旅遊局副局長熊玉梅話，8月8號至20號，北京五星級飯店出租率保持81%，但四星級酒店只有60%，較去年同期跌9個百分點，三星級以下更跌到30%至50%，舊年同期有69%！
佢話，京奧為北京旅遊業留下巨大旅遊資源，好似鳥巢同水立方呢啲landmark，將繼續發揮經濟效益。德勤報告就話，奧運期間北京酒店入住率86.3%，平均房價升咗421%，去到451美金。
旗下北京兩家新酒店趕及7月開幕嘅富力地產，董事長李思廉話，奧運期間入住率未如預期般火爆，房租係平常嘅一倍。不過，中旅（308）董事長張學武就話，奧運期間旗下北京8間酒店入住率幾近全滿，預料京奧將為全年盈利帶來大幫助。
京奧前後更多機會
世紀城市（355）主席羅旭瑞話，由於京奧熱潮，集團近年喺大陸擴展步伐反為保守咗，舊年傾咗唔少內地酒店項目，但都冇落實，因為賣家叫價高。佢相信京奧後，反而有更多好機會，集團已為再度入市做準備。
京奧咁精采，唔少人買定電視睇比賽，既然要換電視機嘅都買咗，所以電視機製造商TCL多媒體（1070）首席執行官梁耀榮話，內地電視機銷售量喺8月份反而減少。
首創置業（2868）更受奧運影響北京物流運輸，搞到延遲北京20萬平方米嘅建築物業施工期，又成奧運輸家之一。