見到堆地圖畫面，咪以為介紹網上導航軟件，查實係PS3一隻新Game！呢款以真實衞星地圖做舞台嘅《TheLastGuy》，目的係邊逃避殭屍、邊救人質出災區，過千人玩拉龍，跟喺你後面不斷驚呼尖叫，嘈喧巴閉，緊張得嚟又幾Funny喎！
記者：徐影龍
高解像地圖 認到地標
上個月《TheLastGuy》公開示範影片，網友機迷睇完話好鬼期待，全因遊戲舞台用咗現實中嘅高解像衞星地圖嚟做，街道比例、建築物100%跟番現實，好多地標一眼已經認得，敵我雙方喺鳥瞰圖上你追我逐，創意夠晒爆燈；而且遊戲預定收錄世界各地大小城市，超過十個地區，當中包括日本淺草、英國倫敦、美國洛杉磯等，相信住喺當地嘅居民，玩起上嚟零舍有Feel，起碼橫街窄巷，有乜捷徑都了然於胸嘛。
最遺憾係暫無省港澳地圖，不過家陣時興網上遊戲升級，若《TheLastGuy》受歡迎嘅話，話唔定佢會陸續加入全球各地嘅城市地圖都未定。
過千蟻民 走夾唔切
齋玩衞星地圖，可能你會覺得悶，不過玩法係你要不斷穿梭大小街道，救出為數不少嘅居民，這些成粒蟻咁細的居民，被救後會跟住你走，條人龍將會越拉越長，去到二三百人時已經唔再係一堆蟻，而會變成一條長龍，而且蟻民仲會大呼小叫，人越多叫得越嘈，拖住呢班人又要迴避各式各樣嘅殭屍，真係幾似玩緊地圖版《貪食蛇》，刺激！
遊戲正式版周四將喺PSN全球同步發售，不過家陣香港Server已有試玩版，217MB好快Download完。實地玩過，基本上齋拖人去EscapeZone過關，無乜難度，不過我想貪分，不斷拖人唔過關，最怕撞正殭屍時畀佢打散人龍，要逐個拖番集合一齊，去到後期過千人時，尖叫聲此起彼落，真係玩到手心冒汗㗎！
逃離蘋果大樓
試玩版得一關唔夠玩，就算日本PSN嘅半完全版（500日圓），三關都係玩淺草，變化不大，中英文正式版又要8月28日先有得Download，好彩SCE諗咗個搞鬼網站出嚟，只要輸入想玩嘅URL，連結嘅網站就搖身一變成遊戲舞台，啲蟻民會匿晒喺JPG圖、文字框等地方，你就用滑鼠控制主角去救佢哋，當然一樣有殭屍出現搞破壞，拖住條人龍喺網站左穿右插，別有一番風味，記住扭大啲電腦喇叭，感受一下嘈到痹嘅蟻民尖叫聲，包你話有氣氛。
當然，你可以輸入番google衞星地圖個URL，揀番香港地圖嚟玩，雖然圖片冇PS3版咁清咁靚，不過點都叫更有親切感，好似我就玩到上腦，Zoom埋將軍澳工業區度，不斷喺蘋果大樓救人，相當之頂癮！
試玩網址： http://lastguy.jp/
《TheLastGuy》
遊戲類型：智力
對應機種：PS3
遊玩人數：1人
推出日期：8月28日全球同步
售價：約$140（PSN下載）
網址： http://www.jp.playstation.com/scej/title/lastguy/
(c)SonyComputerEntertainmentInc.AllRightsReserved.
