中國文字博大精深，真係唔係咁易參得透，一個清晨唔掛嘅八號波，一個清晨唔會落嘅九號波，引發全城對「清晨」嘅好奇，曾經揚言「無一個人可以影響到我」嘅天文台台長林超英，噚日忽然變身文字權威，向巿民講解「清晨」、「黎明」、同「上午」嘅定義，精妙無比，令人歎為觀止。
禮拜四嗰晚臨瞓前，天文台話清晨發出八號風球嘅機會唔大，各位打工仔女唔敢怠慢，乖乖哋上床瞓覺，點知一覺醒來梳頭刷牙着好衫打開電視，咦，又話清晨唔掛八號波，點解突然又掛嘅？
無啦啦多咗日假，打工仔唔會有好大異議，最多唔小心出咗門口食風，之後鸚鵡越嚟越惡，由八號變到九號，正面吹襲來勢洶洶咁，八方禮拜五截稿前打去畀天文台職員，對方誓神劈願話清晨先會考慮改掛較低風球，八方問佢即係幾時，佢就答「earlymorning」，同時擔心八方英文唔好，提醒記者查吓字典睇吓點解，真係有心。
凌晨一至三點係清晨
八方識字唔多，才疏學淺，即刻攞本字典查吓先，「earlymorning」係一大早咁解，咁即係禮拜六一大早都唔會落波，於是即刻call齊啲friend出嚟打通宵牌，點知凌晨12點幾未夠一點，突然聽到電視台話九號變咗八號波，當時仲心諗即係都唔使返工啦，於是繼續打埋兩圈，點知電視台三點未夠突然轉咗三號波。
好多巿民都同八方一樣，畀天文台兩次講清晨玩死，噚日見到呀台長林超英問佢搞乜咁混亂，台長話，根據佢對中文嘅認識，清晨嘅意思係午夜之後一、兩、三點，五、六點叫黎明、七點之後叫上午，即係話第一晚一、兩、三點「真係」冇掛八號波，第二晚差唔多一點先落九號波，都係正確。
不過後來八方聽「最緊要正字」嘅靚女權威、喺中大中文系度教嘅黃念欣講番，原來「清」字有清靜、景物清晰嘅意思；「晨」字從日字部，有天光、日出嘅意思，兩者加埋，就係天光咁解，如果用清晨嚟形容一、兩點就太早，應該用凌晨先啱。
照咁睇，研究科學同文字一樣，都係要專注，台長想兼顧兩瓣，真係唔係咁易。
mailto:[email protected]