「每面奧運金牌咬落都有血有汗」，呢句話聽到都麻木晒；但當你聽到以下呢位運動員嘅辛酸史，點都會感慨。講嘅係「新伏明霞」陳慧琳，哎，唔係，係陳若琳至真，佢前晚至激一跳扭轉亁坤，反勝奪金，嗰一跳只係幾秒鐘時間，而背後就係個足足一年唔食晚飯嘅故事。
至愛蛋糕雪糕不沾唇
10米台跳水呢個項目，換人頻率驚人，中國隊每隔一、兩年就換血，點解？咪因為成長煩惱囉。據講如果保持唔到合適嘅體重，一跳就會沉，試問點樣可以喺跳水台揮灑自如，做晒想做嘅動作？陳若琳呢位未足16歲嘅江蘇姑娘，就正值發育期，為咗保持苗條身材，過去一年唔單止加重訓練量，仲要節食。
佢首先做嘅係「零食勿語」，平時最鍾意食嘅雪糕、奶油蛋糕諗都唔好諗，最誇張係足足一年都唔食晚飯：「其他人夜晚去飯堂食飯，我就會返自己房睇電視或者聽輕鬆音樂，如果真係肚餓就索性大覺瞓，或者讀吓書。」
嫲嫲預備美食擦餐勁
所謂苦盡甘來，陳若琳完成驚世一跳，短期內應該可以放鬆一下唔節食，佢攞完金牌後話最想做嘅事就係大吃一餐，而佢嫲嫲都好識做，話會準備好晒佢鍾意食嘅嘢，一於等孫女擦番餐勁嘅。
運動真義同埋苦行主義係咪一定要掛鈎？呢個問題咁敏感，我判官喺度唔表態，由看官自己判斷啦。
講開又講，我判官冇記錯嘅話，待嫁嘅陳慧琳曾經喺一個訪問中介紹過一個不節食減肥法，只要食得健康，一樣有好身材。個名只係一字之差嘅陳若琳，第日再備戰大賽未必要再節食，到時請教吓Kelly姐姐啦。