國家金牌選手下星期五來港表演，勢必吸引大量市民參觀。照計國家選手苦練經年，辛辛苦苦取得金牌之後，到首都巡遊慶祝一日，係國際體育界常見嘅，但慶祝之後，各人應該回鄉探親，衣錦榮歸，與家人團聚或者放假一兩個星期輕鬆吓啦，點解要咁快就集體來港，為特區市民表演呀？諗深一層，統戰意味好濃，中國咁多大城市又唔見佢哋去？成都應係第一首先，撫慰地震災民係唔係重要過討好香港人先？
九月七日就要投票選出立法會議員，八月係競選活動高峯期，特別係選舉前最後一個周末（八月三十、三十一日），但國家英雄來港搶鋒頭，啲候選人嘅造勢大會當堂冇晒氣勢。根本成個八月內，大家都係講奧運多，講競選少，對選舉興趣不濃，電視台搞選舉論壇，都唔知有多少人睇。左丁山叫做睇過一次，嘩，候選人多，人人要有同樣時間，每人講一次，已經差唔多，其中又有人亂咁噏，無厘頭到極，自己想聽某位候選人講多幾句，但佢唔夠時間講，於是睇睇吓就轉台。
香港選舉有個所謂平等規則，報紙電台講某區競選，講Ａ名單就一定要提及B、C、D、E、F、H、I、J名單，講晒啲名字，要花幾十秒以至兩三分鐘，悶死聽眾，故此如非政治節目，其他主持人避得就避，索性唔講，香港選民每次選舉嘅投票意願都唔高，與呢條規則不無關係，總之政黨有鐵票就掂，有鐵票在手就坐定粒六。
學生Ｙ高考之後，成績O.K.入到中文大學經濟系，令一早批佢入唔到「三大」嘅老師大跌眼鏡。既然入到中大，學生Ｙ心情舒暢到極，經親戚介紹，去咗做競選義工，認識社會。佢本來在住宅所在地讀小學中學，十九歲人好少出城，離開地區嘅機會好少。既然做義工咯，佢就揀咗到港島區派傳單，貼街招，幫手嗌口號，增廣見聞。問學生Ｙ有冇學到嘢，佢話學到唔少，喺北角與華富邨大開眼界，了解多啲民情。佢話到華富邨貼街招，處處碰壁，舖頭夥計/東主往往會問佢：「係唔係民建聯呀？」學生Ｙ答：「唔係。」立即被人喝走，如過街老鼠，一次佢膽粗粗隨口試探話對方：「民建聯呀！」人哋就話：「慢慢貼到夠啦！」學生Ｙ話：「𠵱家我先至明白乜嘢叫做票倉鐵票，爭一張選票，真係得來不易。」