公民黨陳淑莊Tanya踏入政壇，真係要多謝兩個人，唔係黨魁同黨主席，而係自由黨主席田少同港鐵行政總裁周松崗，否則佢都未必贏到區議會山頂議席。Tanya飲水思源，做人不忘本，今次參選都冇忘記周松崗，為免佢又受壓力，搵佢提名就免嘞，其他事就不妨搵佢幫手。
據Tanya講，近日佢企街派單張，有唔少留學生同家長向佢反映，學生放假返香港探親消費，搭港鐵時卻唔可以好似本地學生咁享有優惠，好似不太公道，講到底佢哋都係香港人，只不過唔喺香港讀書啫，計人情講道理都應該可以享用學生票價優惠噃。
Tanya話聽落唔係冇道理，認為港鐵應該大方啲，已去信周松崗要求考慮建議，當然未有回音。佢喺facebook開咗個group，有興趣可以加入爭取行列。